JR NTR SAYS SORRY తలవంచి క్షమించమని అడుగుతున్నా.. అభిమానులకు జూ.ఎన్టీఆర్ సోరీ.. ఆ ఛాలెంజ్ స్వీకరించాలంటూ..

రణ్​బీర్ కపూర్, ఆలియా భట్ జంటగా నటించిన బ్రహ్మాస్త్రం చిత్ర ప్రీ రిలీజ్ ఈవెంట్.. అనివార్య కారణాల వల్ల రద్దు అయ్యింది. రామోజీ ఫిలిం సిటీలో అత్యంత ఘనంగా జరగాల్సిన ఈ ఈవెంట్​ను చివరి నిమిషంలో క్యాన్సిల్ చేశారు. ఈ వేడుకకు ముఖ్య అతిథిగా జూ.ఎన్టీఆర్ వస్తున్నారని తెలిసి.. పెద్ద ఎత్తున ఆయన అభిమానులు అక్కడికి చేరుకున్నారు. చివరికి నిరాశతో వెనుదిరిగారు. అయితే ఈ సినిమాకు దక్షిణాదిలో సమర్పకుడిగా వ్యవహరిస్తున్న రాజమౌళి.. చిత్రబృందంతో పాటు పార్క్ హయత్ హోటల్​లో మీడియా సమావేశం ఏర్పాటు చేశారు. ఈ కార్యక్రమానికి తారక్ ముఖ్య అతిథిగా హాజరయ్యారు. ఈవెంట్ క్యాన్సిల్ అవడానికి గల కారణాలను తెలిపారు.

"రామోజీ ఫిలిం సిటీలో ప్రీ రిలీజ్ ఈవెంట్​ను చాలా గ్రాండ్​గా ఏర్పాటు చేశాం. అందుకోసం ఎంతో కష్టపడ్డాం. కరణ్ జోహార్ వినాయకుడి పూజా సరిగ్గా చేయకపోవడం వల్లే క్యాన్సిల్ అయ్యింటుంది. ఐదు రోజుల కింద కూడా అన్నీ కరెక్ట్​గా ఉన్నాయంటూ పోలీసుల నుంచి పర్మిషన్ వచ్చింది. వారు సూచించిన మార్పులు చేశాం. ఈరోజు ఎక్స్​ట్రా గణేశ్ నిమజ్జనాలు ఉండటం వల్ల పోలీసుల బందోబస్తు కుదరలేదు. మాపై వినాయకుడి కృప లేదనుకుంటా. ఈవెంట్​లో నాకు బాగా నచ్చిన విషయం ఏంటంటే.. బ్రహ్మాస్త్రలో రణ్​బీర్​ మంటను విసరగలడు.. అది లైవ్​లో ఏర్పాటు చేశాం.. అతడు మాట్లాడాకా చివర్లో నీ శక్తి చూపించు అని ఎన్టీఆర్​ అడుగడానికి.. తొడగొట్టు చిన్నా అంటాడు. అప్పుడు కూడా అదిరిపోయే ఫైర్ వర్క్ ఏర్పాటు చేశాం. అది అభిమానుల మధ్య చూడటానికే వచ్చాను" అని అన్నారు.

తారక్ మాట్లాడుతూ తన అభిమానులకు క్షమాపణలు తెలియజేశారు. "ఈవెంట్​కు వచ్చిన, రాలేకపోయిన నా అభిమానులను తలవంచి క్షమించమని అడుగుతున్నా. అయితే మీరు ఎక్కడున్నా.. మంచి సినిమాను ఆదరిస్తారనే నమ్మకం ఉంది. నాకు అమితాబ్ బచ్చన్ చాలా ఇష్టం. ఆయన ఇంటెన్సిటీ, కళ్లు, మాట తీరు, నటన, ప్రతి ఒక్కటీ నన్ను ప్రభావితం చేశారు. ఆ తర్వాత నాపై ప్రభావం చూపిన వ్యక్తి రణ్​బీర్. రణ్​బీర్​లో ఉన్న ఇంటెన్సిటీ.. నాకు స్ఫూర్తి. ఆయన రాక్​స్టార్​ చిత్రం నాకు చాలా ఇష్టం. అతడితో ఒకే స్టేజ్​పై ఉండటం.. బ్రహ్మాస్త్రం ప్రమోషన్స్​లో పాల్గొనడం ఎంతో సంతోషంగా ఉంది. అతడు దీనికి మించిన సినిమాలు మరెన్నో చేయాలని మనస్ఫూర్తిగా కోరుకుంటున్నా. ఈ సినిమా ఇండియన్ ఫిల్మ్ ఇండిస్ట్రీ వదిలిన బ్రహ్మాస్త్రంగా మారాలని ఆకాంక్షిస్తున్నా. రాజమౌళి, కరణ్ జోహార్.. అన్ని ఇండ్రస్ట్రీలను ఏకం చేసి.. ఇండియన్ సినిమాగా మలిచారు.

ప్రస్తుతం ప్రపంచవ్యాప్తంగా సినిమా రంగంపై ఒత్తిడి ఉంది. ప్రేక్షకుడు కొత్తదనాన్ని కోరుకుంటున్నాడు. ఈ సవాలును మనందరం స్వీకరించాలి. ఒత్తిడిలో ఉన్నప్పుడే బాగా పనిచేస్తాం. కాబట్టి ప్రేక్షకుల కోసం గొప్ప కంటెంట్ అందించేందుకు ప్రయత్నిద్దాం.బ్రహ్మాస్త్ర .. ఇండియన్ ఫిల్మ్ ఇండస్ట్రీ బ్రహ్మాస్త్రం లాగా ఉండాలి."
రణ్​బీర్​ కపూర్, ఆలియా భట్ జంటగా నటించిన ఈ చిత్రానికి అయాన్ ముఖర్జీ దర్శకత్వం వహించారు. అమితాబ్ బచ్చన్, నాగార్జున కీలక పాత్రలు పోషించారు. సెప్టెంబర్ 9న హిందీ సహా తెలుగు, తమిళం, కన్నడ, మలయాళ భాషల్లో ఈ సినిమా విడుదల కానుంది.