కొంతలో కొంత కాళిదాసే మేలు..

By Staff

Published: Wednesday, March 11, 2026, 13:26 [IST]

శుక్రవారం రిలీజయిన మూడు సినిమాలలో ( భలే దొంగలు,కాళిదాసు,గీత) కాళిదాసు ఫరవాలేదనిపిస్తున్నాడు. ఫార్ములా కథతో వెళ్ళినా దట్టించిన మసాలా కిక్కిచ్చేలా చేసారు. అందులోనూ నాగార్జున మేనల్లుడు సుశాంత్ పరిచయ చిత్రం కావటంతో మంచి హైప్ తో రిలీజయ్యింది. అన్నపూర్ణ స్టూడియోస్ సమర్పించిన ఈ సినిమాను శ్రీ నాగ్ కార్పొరేషన్ ఈ సినిమాను నిర్మించింది . ఈ సంస్థ తరపున చింతలపూడి శ్రీనివాసరావు, నాగసుశీల నిర్మాతలుగా వ్యవహరించారు. ఇందులో సుశాంత్ సరసన హీరోయిన్‌గా 'హ్యాపీడేస్' ఫేమ్ తమన్నా నటించిన ఈ సినిమాకు జి. రవిచరణ్‌రెడ్డి దర్శకత్వం వహించాడు. అతనికిదే తొలిచిత్రం. చదువు రాని కాళిదాసు చదువుకునే వాళ్ళ కోసం జరిపే పోరాటమే 'కాళిదాసు' ఇతివృత్తం. ఇందులో హీరో కార్ల దొంగగా మాస్ అప్పీలు ఉన్న పాత్రలో కనిపిస్తాడు.

ఇక 'భలే దొంగలు' తమకు మించిన ఆశలతో రోడ్డున పడి ప్రమాదాలు పాలై తిరిగి తమలో ఉన్న మంచితనంతోనే సేవయ్యే ఓ జంట కథ ఇది. బాలీవుడ్ హిట్ 'బంటి ఔర్ బబ్లి 'ఆధారంగా రూపొందించిన ఈ కథ చాలా వరకు ఒరిజనల్ నే ఫాలో అయ్యారు. హీరో హీరోయిన్లు తరుణ్,ఇలియానా లు కాస్త కామిడీగా నవ్వించినా సెంటిమెంటు పాలు ఎక్కువై భాక్సాఫీసు వద్ద గెలిచేటట్లు లేరు. బెల్లంకొండ సురేష్ సమర్పణలో శాఖమూరి పాండురంగారావు నిర్మించిన ఈ చిత్రానికి కె.విజయభాస్కర్ దర్శకుడు.

ఇక 'గీత' సినిమా హాలివుడ్ సినిమా' ఫోన్ బూత్' ను ఫ్రీమేక్ చేసినా ఫలితం కనపడటం లేదు. రిషి,శ్రేయజ,హంసా నందిని హీరో,హీరోయిన్లు గా నటించిన చిత్రమిది. తక్కువ బడ్జెట్ లోనే ఈ సినిమా తీసినా అదే రేంజిలో మరీ తక్కువ మంది ప్రేక్షకులు రావటంతో పెట్టుబడికి ఇబ్బందే. నూతన దర్శకుడు సూర్యతేజ డైరక్ట్ చేసిన ఈ చిత్రాన్నిడా.రవికుమార్ పంపన,డా.కె.హరినాధబాబు నిర్మంచారు.

ఇలా విభిన్న ఇతివృత్తలతో వచ్చిన ఈ మూడు సినిమాలు కాలక్షేపానికి లోటు లేని విధంగా ఉండటం విశేషం.వీటిల్లో కాళిదాసు బి.సి.సెంటర్లపై ఆస పెట్టుకోవచ్చు.