ఎన్నో విమర్శలు గుప్పించారు.. అన్నమయ్య సీక్రెట్స్ చెప్పిన దర్శకేంద్రుడు

దర్శకేంద్రుడిగా వెండితెరపై ఓ వెలుగు వెలుగుతున్నారు రాఘవేంద్రరావు. సీనియర్ దర్శకుడిగా, తెలుగు చిత్ర సీమకు పెద్ద దిక్కుగా ఉండే ఈయన ఎన్నో విలక్షణ కథాంశాలను ప్రేక్షకుల ముందు తెచ్చారు. అయితే ఈ జర్నీలో ఆయన కొన్ని విమర్శలు కూడా ఎదుర్కోవలసి వచ్చిందట. తాజాగా జరిగిన ఓ టీవీ కార్యక్రమంలో ఆ విశేషాలను పంచుకున్నారు రాఘవేంద్రరావు.

అప్పుడూ- ఇప్పుడూ అనే తేడా లేకుండా, ఆ తరం- ఈ తరం అనే తారతమ్యం లేకుండా కొన్ని దశాబ్దాలుగా రాఘవేంద్రరావు సినిమాలు అలరిస్తూనే ఉన్నాయి. ఆయన సినిమాల్లో చెప్పుకోదగిన సినిమా 'అన్నమయ్య'. ఈ సినిమాకు ముందు ఆయన చేసిన సినిమాలు వేరు.. 'అన్నమయ్య' సినిమా వేరు. సో.. ఇలాంటి భక్తి రసమైన సినిమా ఎంచుకొని చాలా విమర్శలు ఎదుర్కొన్నారట దర్శకేంద్రుడు.

'అన్నమయ్య' లాంటి భక్తిరస సినిమా తాను చేయలేనని, ఆ సమయంలో తనపై పెద్ద ఎత్తున విమర్శలు వినిపించాయని స్వయంగా రాఘవేంద్రరావు వెల్లడించారు.
నాగార్జున అన్నమయ్య ఏంటి? మీసాలతో అన్నమయ్యగా కనిపించడం ఏంటి? సుమన్ వేంకటేశ్వర స్వామి ఏంటి? రమ్యకృష్ణ భక్తురాలిగా కనిపించడం ఏంటి? ఈ భక్తి చిత్రంలో మోహన్ బాబు ఏంటి? అంటూ చాలా మంది చాలా రకాలుగా కామెంట్స్ చేశారని ఆయన పేర్కొన్నారు.

అయినప్పటికీ 'అన్నమయ్య' సినిమాతో ప్రేక్షకులను మెప్పించగణనే నమ్మకంతో ఈ మూవీ చేశానని రాఘవేంద్రరావు అన్నారు. ఆ సినిమా కథ వినగానే 'ఈ సినిమాకు పేరే కాదు .. డబ్బులు కూడా వస్తాయి' అని అప్పుడే నాగార్జున ఎమోషనల్ గా చెప్పాడని ఆయన తెలిపారు. మొత్తానికి 'అన్నమయ్య' సినిమా అన్ని వర్గాల ప్రేక్షకులను ఆకట్టుకోవడం సంతోషాన్నిచిందని రాఘవేంద్రరావు అన్నారు.