ఎన్నికల్లో ఓడిపోవాలని శపించిన వర్మ: ‘లక్ష్మీస్ ఎన్టీఆర్’ ప్రభావం ఉంటుందట!

ఈ ఎన్నికలలో ఓటమి ప్రాప్తించుగాక

‘‘సినిమా కోసం పుట్టి, సినిమా మూలంగా సీఎం అయిన మహానాయకుడు ఎలా సీఎం పదవి పోగొట్టుకున్నాడో అనే సినిమా చూడకుండా ఆపుతున్న తెర వెనక ఉన్న వెన్నుపోటు డైరెక్టర్‌కి నాలాంటి కోట్ల ఎన్టీఆర్ అభిమానులందరం కమండలం‌లో నీళ్లు తీసి శపిస్తున్నాం.. ఈ ఎన్నికలలో ఓటమి ప్రాప్తించుగాక.. తధాస్తు'' అంటూ రామ్ గోపాల్ వర్మ తన అసంతృప్తి వ్యక్తం చేశారు.

24 ఏళ్ల క్రితం జరిగిన కథ

ఓ టీవీ ఛానల్ ఇంటర్వ్యూలో రామ్ గోపాల్ వర్మ మాట్లాడుతూ.... ‘లక్ష్మీస్ ఎన్టీఆర్' సినిమా అనేది 24 ఏళ్ల క్రితం జరిగిన కథ. అందులో కీలక పాత్రధారులు ఉన్నారు. ముఖ్యంగా చంద్రబాబు నాయుడు... వైస్రాయ్ హోటల్‌లో ఏం జరిగింది అనేది అందరికీ తెలుసు. వెన్నుపోటు ఉదంతంలో ఎవరెవరు కీలకపాత్ర పోషించారనే విషయం అందరికీ తెలుసు. ఇదేమీ రహస్యం కాదని తెలిపారు.

ఇంపాక్ట్ అనేది ఉంటుంది, కానీ...

నేను తీసిన ఈ సినిమా ఎన్నికలపై ఎలాంటి ఎఫెక్ట్ చూపిస్తుందని అడిగే వారికి నేను చెప్పేద ఒకటే. ఓటర్‌కు ఒక నమ్మకం అనేది ఉంటుంది. నాయకుడు ఏం చేశాడు, ఆ పార్టీ ఏం చేసింది, ఇంకో ఎవరో వస్తే ఏం చేయబోతున్నారు ఇలాంటి అంశాల ఆధారంగా అతడు నిర్ణయం తీసుకుంటాడు. దీంతో పాటు ఒక ట్రస్ట్ ఫ్యాక్టర్ ఉంటుంది. లక్ష్మీస్ ఎన్టీఆర్ సినిమా చూసి ఏదైనా కొత్త విషయం తెలిసో, అతడు అంతకు ముందు నమ్మిన దానికి భిన్నంగా ఉండి ఇదే ఇక్కువ నమ్మేవిధంగా ఉన్నపుడు తప్పకుండా ఎంతో కొంత ఇంపాక్ట్ ఉంటుంది. అది ఎంత మంది మీద ఉంటుంది? ఏ కోణంలో ఉంటుంది అనేది నేను అంచనా వేయలేను. ఓటరు దేన్ని నమ్మాడు? అతడికి ఎంత తెలుసు? ఇవన్నీ కలిసి ప్రతి వ్యక్తికి ఒక డిఫరెంట్ ఇంపాక్ట్ ఉంటుందని.. వర్మ తెలిపారు. .

అందుకే వర్మ ఎన్నికల ముందు ఈ సినిమా తీసుకొస్తున్నారా?

సినిమా వల్ల కనీసం ఒక 50 శాతం అయినా ఇంపాక్ట్ ఉంటుందనుకున్నాం... అందుకే వర్మ ఎన్నికల ముందు ఈ సినిమా తీసుకొస్తున్నారా? అనే ప్రశ్నకు స్పందిస్తూ... ‘‘ఎన్నికలు ఇప్పుడు లేవు అనుకోండి, ఇదే సినిమా మూడు నెలలు ముందు వచ్చింది అనుకోండి... మీ ఇంప్రెషన్ అనేది అలాగే ఉంటుంది కదా.'' అని వర్మ చెప్పుకొచ్చారు.

బాలయ్య వల్లే ఈ సినిమా ఆలోచన

నాకు ఈ సినిమా తీయాలనే ఆలోచన రావడానికి కారణం బాలకృష్ణగారు. ఆయన ఎన్టీఆర్ బయోపిక్ తీయాలనే ఆలోచనలో గతంలో నన్ను కలిశారు. లక్ష్మీపార్వతి ఎపిసోడ్ లేకుండా నేను తీయను అని చెప్పాను. బయోపిక్ అంటే అన్నీ ఉండాలి. గాంధీగారి సినిమాలో బ్రిటిష్ అనే నెగెటివ్ ఫోర్స్ ఉంది. వాళ్లతో పోరాటం చేసి స్వాతంత్ర్యం ఎలా సాధించారనేది బయోపిక్ మెటీరియల్. ఇవి కాకుండా ఆయన పోరుబందర్‌లో పుట్టారు. స్కూలుకు వెళ్లారు, ఉన్నత చదువుల కోసం సౌతాఫ్రికా వెళ్లారు, ఎలా పెళ్లి చేసుకున్నారు అనే విషయాలు చెప్పి బ్రిటిష్ రాగానే సినిమా ఆపేస్తే ఎలా ఉంటుంది? అందుకే నేను చేయనని చెప్పాను. తర్వాత నాకు లక్ష్మీ పార్వతి ఎపిసోడ్‌తో సినిమా తీయాలనిపించిందని ఆర్జీవీ తెలిపారు.

సినిమాలో ప్రధానంగా చూపించేది అదే

ఎన్టీ రామారావుగారి లైఫ్ చాలా స్ట్రైట్ లైన్ లైఫ్. సినిమా స్టార్ అయ్యాడు, తర్వాత పొలిటికల్ లీడర్ అయ్యాడు. లక్ష్మీపార్వతి ఎంటరైన తర్వాతే ఆ లైనుకు బ్రేక్ వచ్చింది. ఆ సమయంలోనే ఎన్టీఆర్ సోల్ అనేది బయటకు వచ్చింది. ‘లక్ష్మీస్ ఎన్టీఆర్' మూవీలో ప్రధానంగా చూపించే అంశం అదే అని వర్మ తెలిపారు.