చిరంజీవి చెప్పిన కొటేషన్‌ను ఆఫీస్‌లో పెట్టండి.. మురళీ మోహన్ స్పీచ్

మంచి మైకులో.. చెడు చెవిలో

మూవీ ఆర్టిస్ట్ అసోసియేషన్ (మా) లో అంతర్గత విభేదాల గురించి అందరికీ తెలిసిందే. నరేష్, జీవిత, రాజశేఖర్ మీడియా ముందుకు రావడం, ఒకరిపై ఒకరు విమర్శలు చేసుకోవడం అప్పట్లో సెన్సేషనల్‌గా మారాయి. సినీ పెద్దలు మధ్యవర్తిత్వం చేసినా ఆ విభేదాలు సద్దుమణగకపోవడం వంటి వాటిపై చిరంజీవి మాట్లాడుతూ.. మంచి విషయాలు ఉంటే మైక్‌లో చెప్పుకొందాం.. చెడు విషయాలు ఉంటే చెవిలో చెప్పుకొందామంటూ సలహా ఇచ్చాడు.

రాజశేఖర్ ఫైర్..

అనంతరం మైకు అందుకున్న రాజశేఖర్.. చిరు మాటలను, ప్రసంగంపై సెటైర్లు వేశాడు. నిప్పును దాచి పెడితే పొగ రాకుండా ఉండదని, గత సభ్యులు బాగా చేయలేదనే, తమను గెలిపించారని అలాంటప్పుడు వారు బాగా చేశారని ఎలా చెబుతారంటూ చెప్పుకొచ్చాడు. తనకు బయటకు ఒకలా లోపల ఇంకోలా మాట్లాడటం రాదని చెబుతూ.. గరంగరంగా బయటకు వెళ్లిపోయాడు.

అలా పుట్టింది..

విశాఖపట్నం నుంచి విమానంలో వస్తుండగా.. మా ఆలోచన పుట్టింది. అలా గాల్లో మాకు పునాదులు పడ్డాయని మురళీ మోహన్ చెప్పుకొచ్చాడు. మలయాళ ఇండస్ట్రీ అమ్మ అని పెట్టుకుంటే.. దాంట్లోంచి మా అని నామకరణం చేశామని, దానికి బాపు గారు మోనోగ్రామ్ వేసి ఇచ్చారని నాటి సంగతులను గుర్తు చేసుకున్నాడు. మొదట్లో ఎన్నో కష్టాలను ఎదుర్కొన్నామని, ఆర్టిస్ట్‌ల అంతిమ యాత్రలు ఎంతో ఘనంగా చేయాలని ఫిక్స్ అయ్యామని, అప్పట్లో ఆఫీస్,మూలధనం లాంటివి ఏవీ లేకపోయినా తలా కొంత వేసుకుని చేశామని పేర్కొన్నాడు.

ఆఫీస్‌లో పెట్టండి..

మంచిని మైకులో చెడును చెవిలో చెప్పండి అని చిరంజీవి చక్కగా చెప్పారని, ఆ మాటను మా ఆఫీస్‌లో రాసి పెట్టండని మురళీ మోహన్ సూచించాడు. మా ఉన్నది అధికారం చెలాయించడం కోసం కాదు.. పేద కళాకారులకు సహాయం చేయడానికేనని పేర్కొన్నాడు. ప్రతీ ఆర్టిస్ట్ తన పుట్టినరోజుకు ఎంత వయసు ఉంటే అన్ని వేల రూపాయలు డొనేషన్‌గా ఇవ్వాలని ఏఎన్నార్ అన్నట్టు ఈ సందర్భంగా చెప్పుకొచ్చాడు. సినీ ఇండస్ట్రీకి సంబంధించిన అవార్డులు, ఇతర సమస్యల గురించి ఇరు రాష్ట్రాల సీఎంలతో చర్చించాలని చిరంజీవి, మోహన్ బాబును కోరాడు.