మహేష్,రామ్ చరణ్ వినాయక చవితి ముచ్చట్లు(ఫోటో ఫీచర్)

ఇష్టమైన పండగ - రామ్‌చరణ్‌

''నాకు ప్రత్యేకమైన పండగ వినాయక చవితి. ఏటా సందడిగా జరుపుకొంటాం. ఏ పండగైనా ఒకట్రెండు రోజులే. వినాయక చవితి మాత్రం వారంపాటు రోజూ చేసుకొన్నట్టుగా ఉంటుంది. చిన్నప్పుడు స్నేహితులతో కలిసి వెళ్లి గణపతి విగ్రహాన్ని కొనుక్కొచ్చేవాణ్ని. ఇంట్లో ప్రతిష్ఠించి పూజలు చేసుకొనేవాళ్లం. ఇంట్లో పూజ అయిపోగానే వీధిలో ప్రతిష్ఠించిన వినాయకుడి దగ్గరకి వెళ్లేవాళ్లం. ఆటలు పాటలు అన్నీ అక్కడే. ఎప్పుడో కానీ ఇంటికి వెళ్లేవాణ్ని కాదు. పెద్దయ్యాక ఆ సందడి కాస్త తగ్గినా... ఇప్పటికీ నాకు ఇష్టమైన పండగంటే వినాయక చవితే. గతేడాది ఉపాసనతో కలిసి పూజల్లో పాల్గొన్నాను. ఈసారి కూడా కుటుంబ సభ్యుల మధ్య పండగని జరుపుకొంటాను. పర్యావరణాన్ని దృష్టిలో పెట్టుకొని మట్టివిగ్రహాల్ని ప్రతిష్ఠించుకోవడం మేలు''.

చిన్ననాటి రోజుల్లో - మహేష్‌బాబు

వినాయకచవితి అనగానే చెన్నైలో అందరితో కలిసి ఆనందంగా గడిపిన రోజులు నాకు గుర్తుకొస్తాయి. గణేష్‌ మండపాల్ని చూసేందుకు అందరం కలిసి వెళ్లేవాళ్లం. ఇంట్లో పూజని కుటుంబ సభ్యులతో ఘనంగా జరుపుకొనే వాళ్లం. ఇప్పుడు మట్టి విగ్రహాలకే ప్రాధాన్యమిస్తాను. అందరికీ ఇదే చెప్తాను. పర్యావరణాన్ని పరిరక్షించడం అవసరం కదా. ఎంత పెద్ద విగ్రహం పెడితే పూజ అంత ఘనంగా చేసినట్లు అనుకుకోకూడదు''.

పోటాపోటీగా తిరిగేవాళ్లం - హరిప్రియ

''వినాయకచవితి అంటే నాకు చాలా సరదా. చిన్నతనంలో మేం చేసిన సందడి గుర్తుకు తెచ్చుకుంటే ఆనందంగా ఉంటుంది. మా ఇంట్లో పూజ ఉండేది కాదు. మా అమ్మమ్మ వాళ్లింట్లో జరుగుతుంది. దీంతో చిన్నతనంలో వినాయకచవితి వచ్చిందంటే అక్కడికి వెళ్లిపోయేదాన్ని. మా కజిన్స్‌, స్నేహితులతో అల్లరే అల్లరి. ఆ రోజు ఉదయం నుంచి రాత్రివరకు ఎవరు ఎక్కువ విగ్రహాల్ని చూస్తారా అని. మా మధ్య ఓ పోటీ ఉండేది. గతేడాది వినాయకచవితిని మాత్రం నేను మరచిపోలేను. ఆ రోజు 'అబ్బాయి క్లాస్‌ అమ్మాయి మాస్‌' చిత్రీకరణలో ఉన్నాను. ఈసారి ఒక్క గణేష్‌ విగ్రహాన్ని కూడా చూడలేదే అని సాయంత్రం వరకు అనుకున్నా. కానీ చిత్రీకరణ అయిపోయి తిరిగి వెళ్తున్నప్పుడు నా కారు డ్రైవరు ఓ వీధి నుంచి తీసుకెళ్లాడు. అక్కడ చాలా విగ్రహాలున్నాయి. వాటిని చూస్తే ఆనందమేసింది''.

అమ్మ నుంచి వచ్చింది - కరీనా కపూర్‌

''వినాయక చవితి అంటే ముందుగా గుర్తొచ్చేది పిల్లల హడావుడి. నా చిన్నతనం నుంచి ఈ పండగ రోజు మా అల్లరిని చూసి అందరూ ఆనందించేవారే. మా తాత రాజ్‌కపూర్‌ హయాం నుంచి మా ఇంట్లో వినాయకచవితిని ఘనంగా జరుపుతున్నారని అమ్మ చెప్పింది. మిగతా పండగలతో పోలిస్తే వినాయకుడికి పూజాకార్యక్రమాలు ఎక్కువగా ఉంటాయి. మా అమ్మ బబిత ఈ పూజని నిష్టగా చేస్తుంది. నాకు అమె నుంచే ఈ అలవాటు వచ్చింది. మా అక్క కూడా ఇంతే. ఇద్దరం ఎంతో శ్రద్ధగా పూజలు చేస్తాం. 'హీరోయిన్‌' చిత్రీకరణ సమయంలో వినాయకుని దేవాలయాలకు వెళ్లి దర్శించుకోవడాన్ని మరచిపోలేను''.

మామూలు ఆడపిల్లలాగే - సోనాక్షి సిన్హా

ఆడపిల్లలు ఎంత ఎదిగినా సంప్రదాయాన్ని మరచిపోకూడదనేది మా అమ్మ సిద్ధాంతం. సంప్రదాయాల విషయంలో అమ్మ నిక్కచ్చిగా ఉంటుంది. అందుకే ఇంట్లో ఎప్పుడైనా మాములు ఆడపిల్లల్లాగే అన్ని పనులు చేయాల్సిందే. నేనేదో కథానాయికను కాబట్టి తప్పించుకుంటానంటే కుదరదు. అదే వినాయకచవితి వచ్చిందంటే పూజా కార్యక్రమాలు నేనే చేస్తాను. కథ ప్రతి ఏడాది చదవడంతో కంఠతా వచ్చేసింది. పుస్తకాలతో పని లేకుండా పూజ చేస్తాను''.

శుభాకాంక్షలు..

పాఠకులందరికీ ధట్స్ తెలుగు ...వినాయక చవతి శుభాకాంక్షలు తెలియచేస్తోంది.

శుక్లాంబర ధరం విష్ణుం శశివర్ణం చతుర్భుజం
ప్రసన్న వదనం ధ్యాయేత్‌ సర్వ విఘ్నోప శాంతయే

తెల్లని వస్త్రాలు ధరించినవాడూ, అంతటా వ్యాపించియున్నవాడూ, చంద్రునిలా తెల్లనైన శరీరవర్ణం గలవాడూ, నాలుగు చేతులు గలవాడూ, అనుగ్రహదృష్టితోడి ముఖంగలవాడూ అయిన వానిని (వినాయకుని) అన్ని అడ్డంకులు నివారించుటకై ధ్యానించవలెను (ధ్యానిస్తున్నాను)

అగజానన పద్మార్కం గజాననమ్‌ అహర్నిశం
అనేకదమ్‌ తమ్‌ భక్తానాం ఏకదంతమ్‌ ఉపాస్మహే
(అగజ)పార్వతి ముఖపద్మమును వెలిగించువాడు, ఏనుగు ముఖము గలవాడు, అన్నివేళలా ఎన్నోవిధములైసంపదలను తన భక్తులకు ఇచ్చువాడు అయిన ఏకదంతుని స్మరిస్తున్నాను.