పవన్ రికార్డు బద్దలు కొట్టిన మహేష్: 'భరత్ అనే నేను' దుమ్మురేపిందిగా!..

సూపర్‌ స్టార్‌ మహేష్‌ బాబు 'భరత్ అనే నేను' మరో రికార్డు సొంతం చేసుకుంది. టాలీవుడ్‌లో ఇప్పటిదాకా అత్యధిక లైక్‌లు సాధించిన టీజర్‌గా కొత్త రికార్డు సృష్టించింది.

అంతకు ముందు ఈ రికార్డు పవన్‌ కళ్యాణ్‌ అజ్ఞాతవాసి పేరిట ఉండేది. ఇప్పుడా రికార్డును 'భరత్ అనే నేను' బ్రేక్ చేసింది. ఈ సినిమా టీజర్‌కు ఇప్పటిదాకా కోటి 32లక్షలకు పైగా వ్యూస్, 5.26 లక్షల పైచిలుకు లైక్స్ వచ్చాయి.

'చిన్నప్పుడు మా అమ్మ నాకో మాట చెప్పింది. ఒకసారి ప్రామిస్ చేసి ఆ మాట తప్పితే నువ్వు మనిషివి అనిపించుకోవని..' అంటూ టీజర్‌లో మహేష్ చెప్పిన డైలాగ్ విశేషంగా ఆకట్టుకుంటోంది.

కొరటాల శివ దర్శకత్వం వహిస్తున్న ఈ చిత్రంలో కైరా అద్వానీ హీరోయిన్‌గా నటిస్తుండగా.. మహేష్‌ సీఎం పాత్రలో కనిపించబోతున్నాడు. సమకాలీన రాజకీయ అంశాలను మేళవిస్తూ తీసిన ఈ చిత్రం ఏప్రిల్‌ 20న ప్రేక్షకుల ముందుకు రానుంది.