మరోసారి ‘దూకుడు’కాంబినేషన్ ..డిటేల్స్

హైదరాబాద్ : నేను చేయబోయే తదుపరి చిత్రం మహేష్‌బాబుతో ఉంటుంది. ఇప్పటికే కథ కూడా సిద్ధం చేశాం. దూకుడు నిర్మాతలతోనే ఈ చిత్రం ఉంటుంది అన్నారు శ్రీను వైట్ల. అంటే 'దూకుడు' కాంబినేషన్ త్వరలోనే రిపీట్ కాబోతోందన్నమాట. గత ఏడాది సెప్టెంబర్ 23న 'దూకుడు' విడుదలైంది. అంటే నిన్నటికి(ఆదివారం) ఆ సినిమా వచ్చి ఏడాది పూర్తయింది. వరస ప్లాపుల్లో ఉన్న మహేష్‌బాబు హిట్టిచ్చి స్టార్‌డమ్‌ను ఆకాశమంత ఎత్తులో నిలబెట్టిన సినిమా ఇది. దర్శకునిగా శ్రీనువైట్లకు కూడా ఎనలేని గుర్తింపు తెచ్చిపెట్టింది.

అలాగే ఆ తాజా చిత్రానికీ 'దూకుడు' నిర్మాతలైన రామ్ ఆచంట, గోపీచంద్ ఆచంట, అనిల్ సుంకరలే నిర్మాతలు కావటం కూడా అభిమానులకు ఆనందపరిచే విషయం. వచ్చే ఏడాది ఈ భారీ చిత్రం మొదలుకానుందని నిర్మాతలు ఓ ప్రకటన ద్వారా తెలియజేశారు. శ్రీనువైట్ల అద్భుతమైన స్క్రిప్ట్ సిద్ధం చేశారని, ఎన్టీఆర్‌తో ఆయన చేస్తున్న 'బాద్‌షా' చిత్రం పూర్తవ్వగానే ఈ సినిమా మొదలవుతుందని ఈ సందర్భంగా వారు చెప్పారు. 14 రీల్స్ ఎంటర్‌టైన్‌మెంట్ పతాకంపై ఈ చిత్రం తెరకెక్కనుంది. ఇప్పటికే ఇదే సంస్థలో మహేష్ హీరోగా సుకుమార్ దర్శకత్వంలో ప్రస్తుతం వీరు ఓ చిత్రం నిర్మిస్తున్న విషయం తెలిసిందే.

సినిమా ఎలా ఉండబోతుంది అనేదానికి శ్రీను వైట్ల సమాధానమిస్తూ .....స్వతహాగా నాకు ఫైట్స్ , హీరోయిజంతో కూడిన మాస్‌ అంశాలంటే చాలా ఇష్టం. ఆ తరహా సినిమాల్ని ఎక్కువగా చూశాను. అలాగే జంధ్యాల, వంశీ, ఇ.వి.వి.సత్యనారాయణ లాంటి దర్శకుల సినిమాల్లో వినోదం అంటే కూడా చాలా చాలా ఇష్టం. నా మాట తీరులోనూ, ఆలోచనా విధానంలోనూ హాస్యం తొంగి చూస్తుంటుందని స్నేహితులు చెబుతుండేవారు. ఇవన్నీ ఓ కథలో మిళితం చేస్తే ఎలా ఉంటుందనే ఆలోచనతో 'వెంకీ' చేశాను. అప్పట్నుంచి నాకు ఆ సూత్రం అలవాటైంది అన్నారు.

'ఢీ', 'రెడీ'.. ఇలా ప్రతి సినిమాకీ నేపథ్యం భిన్నంగా ఉన్నా... అందులో యాక్షన్‌, వినోదం, భావోద్వేగాలు మేళవించడం మాత్రం మరిచిపోలేదు. మరో ప్రక్క 'దూకుడు' చిత్రాన్ని హిందీలోకి తీసుకెళ్తటానికి సన్నాహాలు జరుగుతున్నాయి. ఈ విషయమై శ్రీను వైట్ల మాట్లాడుతూ....ఆ సినిమా హక్కులు హిందీలో చాలా మంది అడుగుతున్నారు. కానీ అక్కడ కూడా మేమే నిర్మించాలనే ఉద్దేశంతో హక్కుల్ని ఎవరికీ ఇవ్వలేదు. బహుశా... వచ్చే యేడాది హిందీ 'దూకుడు' ఉంటుంది అన్నారు.