మళ్లీ తండ్రైన మహేష్ బాబు (అఫీషియల్)

News

oi-Santhosh

By Bojja Kumar

| Updated: Friday, July 20, 2012, 12:00 [IST]

సూపర్ స్టార్ మహేష్‌బాబు, నమ్రతా శిరోద్కర్ దంపతులు మరో బిడ్డకు జన్మనిచ్చారు. ఈ రోజు(శుక్రవారం, జూలై 20) ఉదయం 8.15 గంటలకు నమ్రత పండంటి ఆడపిల్లకు జన్మనిచ్చింది. హైదరాబాద్ లోని స్వప్న నర్సింగ్ హోంలో నమ్రత ప్రసవించింది. తల్లి, పిల్ల ఆరోగ్యంగా ఉన్నారు. ప్రసవం సమయంలో మహేష్ బాబు పక్కనే ఉండి నమ్రతకు మనో ధైర్యాన్ని ఇచ్చినట్లు సన్నిహితుల నుంచి అందిన సమాచారం. ఈ పాప మహేష్‌బాబుకు రెండో సంతానం. ఆయనకు ఇప్పటికే గౌతమ్ అనే కొడుకు ఉన్న సంగతి తెలిసిందే.

కొన్ని రోజుల క్రితమే నమ్రత ఆడపిల్లకు జన్మనిచ్చిందంటూ పుకారు వినిపించింది. అయితే ఆ తర్వాత నమ్రత ఆ విషయాన్ని ఖండిస్తూ.....ఆగస్టులో డెలివరీ అవ్వొచ్చని వెల్లడించారు. అయితే ఆమె చెప్పిన దానికంటే ముందే ప్రసవం అవ్వడం గమనార్హం.

కాగా.. మహేష్ మళ్లీ తండ్రైన వార్త అధికారికంగా దృవీకరణ కావడంతో మహేష్ బాబు అభిమానులు సంబరాలు చేసుకుంటున్నారు. కొన్ని చోట్ల స్వీట్లు పంచారు. ప్రస్తుతం మహేష్ బాబు 'సీతమ్మ వాకిట్లో సిరిమల్లె చెట్టు' చిత్రంలో నటిస్తున్నారు. నమ్రత ప్రసవించిన నేపథ్యంలో ఓ వారం రోజుల పాటు ఆయన షూటింగులకు బ్రేక్ ఇచ్చే అవకాశం ఉంది.

మహేష్-నమ్రత 5 సంవత్సరాల ప్రేమాయణం అనంతరం 2005 ఫిబ్రవరిలో ముంబైలో పెళ్లి చేసుకున్నారు. 2000 సంవత్సరంలో వచ్చిన వంశీ చిత్రంలో ఇద్దరు కలిసి నటించారు. ఆ సినిమాలో పరిచయం వీరి మధ్య ప్రేమకు దారి తీసింది. అనంతరం పెళ్లి చేసుకున్నారు. 2006, ఆగస్టు 31న గౌతంకు జన్మనిచ్చారు.