ఇది ముందే తెలిస్తే సినిమా తీసేవాడిని కాదు, భయం వేస్తోంది: ‘యాత్ర’ డైరెక్టర్ కామెంట్

రుణం అనే ఫీలింగ్ రావడం చాలా గొప్ప విషయం

నేను అనుకున్న కథ చెప్పాను. ఆ కథ వల్ల ఎదుటి మనిషికి ఆ స్థాయిలో గ్రేట్‌ఫుల్‌నెస్, రుణం అనే ఫీలింగ్ రావడం చాలా గొప్ప విషయం. నాకు తెలిసి నా జీవితంలో నాలుగైదు సినిమాలు చేయవచ్చు. అవి ఆడొచ్చు, ఆడకపోవచ్చు... కానీ ఈ సినిమాకు వచ్చినంత అభిమానం అయితే రాదు.

ఆ చిన్న సీన్ కూడా గుర్తు పెట్టుకున్నారు

సినిమా రాసేపుడు చాలా చిన్నచిన్న సంఘటనలు ఉన్నాయి. ప్రేక్షకులు వాటిని కూడా గుర్తు పెట్టుకుని చెప్పడం ఆనందంగా అనిపించింది. ఓ సీన్లో రాజశేఖర్ రెడ్డిగారు నడుచుకుంటూ వచ్చి చక్కర లేకుండా టీ ఇవ్వమని అడుగుతారు. రేటింగ్ బాగొచ్చిందనో, కలెక్షన్ల గురించి చెప్పినపుడు అంత ఆనందం అనిపించలేదు కానీ... ఆడియన్స్ అంత చిన్న విషయం కూడా గమనించేంత ఫోకస్డ్‌గా సినిమా చూశారనే ఫీలింగ్ చాలా గొప్పగా అనిపించింది.

సినిమా కలెక్షన్లపై...

కళను మనం సాధారణంగా కలెక్షన్లతో పోలుస్తాం. కానీ నాకు అలా పోల్చడం తెలియదు. రూ. 500 కోట్లు వచ్చిన సినిమా గొప్పనా? ‘3 ఇడియట్స్' గొప్పనా? అంటే నేను 3 ఇడియట్స్ గొప్ప అంటాను. నాకు సినిమాను ఎలా క్వాంటిఫై చేయాలో తెలియదు. ఇంకో సినిమా ఎప్పుడైనా బాగా కలెక్షన్స్ రావొచ్చు. కానీ నువ్వు పొందిన ప్రశంసలకు విలువ కట్టలేం. మనకు ప్రతిదీ డ్యూయల్ గా చూడటం అలవాటైంది. పదేళ్లు ప్రేమిస్తే ఓ ప్రేమ, 20 ఏళ్లు ప్రేమిస్తే ఓ ప్రేమ అని లెక్క వేయడం నాకు తెలియదు.

సీమ నుంచే కాదు.. తెలంగాణ నుంచి కూడా

నా సినిమా నేను బావుందని చెప్పడం కన్నా.. ఎవరో చూసి బావుంది అని మౌత్ టాక్ స్ప్రెడ్ చేయడం ఇంకా బావుంటుంది. ఈ సినిమాకు సీడెడ్లో ఎక్కువ ఆదరణ వస్తుందనుకున్నాను. కానీ ఆశ్చర్యకరంగా నాకు నల్లగొండ, వరంగల్ నుంచి మంచి రెస్పాన్స్ వచ్చింది. మా రాజన్నను చూపించారు అని చెబుతున్నారు.

ఇది ముందే తెలిస్తే సినిమా తీసేవాడిని కాదు, భయం పట్టుకుంది

ఇంత అభిమానం ఉందని తెలిస్తే ఈ కథ చెప్పేవాన్ని కాదు. ఎందుకంటే నాకు అంతధైర్యం లేదు. ఇంత అభిమానం ఉందని నాకు ఇప్పుడు భయం పట్టుకుంది. ఇంత అభిమానం ఉందని తెలియక చేశాను. సినిమా చూసిన ప్రతి ఒక్కరికీ థాంక్స్... అని మహి వి రాఘవ్ వ్యాఖ్యానించారు.