ఈ కులంలో పుట్టడం తప్పా? నేను చాలా కోల్పోయా: కమెడియన్ పృథ్వి

డీఎస్పీ, ఎస్పీ అయ్యేవాడిని

ఓసీ అవడం వల్లనే తనకు పోలీస్ ఉద్యోగం రాలేదని, వచ్చిఉంటే ఎప్పుడో డీఎస్పీ అయ్యేవాడినని, ఆ తర్వాత ఏ మంత్రి దగ్గరో చేరి భజన లేదా మరోదో చేసినా ఇప్పటికి ఎస్పీ కూడా అయిపోయేవాడిని అని, తనలా అవకాశాలు కోల్పోయిన వారు లక్షల్లో ఉన్నారని కమెడియన్ పృథ్వి చెప్పుకొచ్చారు.

90 శాతం మంది చితికిపోయిన వారే

ఓసీల్లో ఒక లక్ష మందిలో పదివేల మంది మాత్రమే ఆర్థికంగా బలంగా ఉండి, బ్రహ్మాండంగా బ్రతుకుతున్నారని, మిగతా 90 శాతం మంది ఆర్థికంగా చితికిపోయి చాలా కష్టపడుతున్నారని పృథ్వి చెప్పుకొచ్చారు.

కావాల్సింది కులం కిరీటాలు కాదు

‘ఏమండీ, నాయుడు గారు' అని పిలిస్తే.. ‘నమస్తే అండి' అనడం, ‘ఒరేయ్, పది కాఫీలు చెప్పు' అని పురమాయించడం.. కావాల్సింది ఇలాంటి కిరీటాలు కాదు. ఆర్థికంగా మెరుగుపడటం కావాలి. మంచి బట్టలు వేసుకుని పైకి బ్రహ్మాండంగా కనపడతాం కానీ, జేబులో వంద కూడా ఉండనిపరిస్థితిలో చాలా మంది ఉన్నారని పృథ్వి తెలిపారు.

ఆర్థికంగా వెనుకబడిన వాళ్లందరినీ గుర్తించమని కోరుతున్నా

ఇక్కడ నేను మాట్లాడేదాంట్లో ప్రధాన ఉద్దేశ్యం.... ఆర్థికంగా వెనుకబడిన వాళ్లందరినీ గుర్తించమని కోరుతున్నా. నేను వర్గీకరణను తప్పుబట్టడం లేదు. వర్గీకరణలను గౌరవిస్తాం, అందరం ఒక కుటుంబంలా ఉందామనదే తన అభిప్రాయమని పృథ్వి తెలిపారు.

నిలదీసే రోజు ఒకటి వస్తుంది

ఓసీల్లో ఆర్థికంగా వెనుకబడిన వాళ్లకు ఏం చేస్తారో చెప్పండి, లేకపోతే, మా గ్రామంలో అడుగుపెట్టొద్దు' అంటూ రాజకీయనాయకులను నిలదీసేరోజు వస్తుంది' అని ఈ సందర్భంగా పృథ్వీ వ్యాఖ్యానించారు.