నాగార్జున నాకు పెద్ద పరీక్షే పెట్టాడు?.. ఆ ప్రశ్నలు వెంటాడుతాయి, కానీ!: 'హలో'పై చిరంజీవి..

అక్కినేని కుటుంబానికి 'హలో' అనుబంధం:

"తరాలుగా అందరి నోళ్లలో నానుతున్న పదం 'హలో'. ఆ మాటకీ అక్కినేని కుటుంబానికి విడదీయలేని అనుబంధం ఉంది. అప్పట్లో అక్కినేని నాగేశ్వరరావు 'హలో హలో...' అంటూ సాగిపోయే పాట పాడారు. ఆ తర్వాత నాగార్జున, అమల 'హలో గురూ...' అని పాడుకున్నారు. నాగార్జున హీరోగా 'హలోబ్రదర్‌' అనే సినిమా కూడా వచ్చింది. ఇప్పుడు అఖిల్‌ కూడా 'హలో' అంటూ వచ్చేస్తున్నాడు."-చిరంజీవి

అఖిల్ 'బంగారం':

'మనం' చిత్రాన్ని చరిత్రలో నిలిచిపోయేలా తెరకెక్కించిన విక్రమ్‌, అదే స్థాయిలో 'హలో' ప్రేమ కథని తెరకెక్కించాడన్నారు చిరంజీవి. అఖిల్‌ ఈ సినిమాతో నటుడిగా మరో మెట్టు ఎక్కుతాడన్నారు.

వినయంలో, సంస్కారంలో అఖిల్ బంగారం అన్నారు చిరంజీవి. అలాంటి బంగారాన్ని కన్నందుకు గాను అమలను,నాగార్జునను అభినందించారు .

అదో పరీక్షలాంటిదే:

సినిమా విడుదల కాకముందే చూడటం ఓ పరీక్ష లాంటిదన్నారు చిరంజీవి. బాగుంటుందా? ఉండదా? చూశాక ఎలా స్పందించాలి? లాంటి ప్రశ్నలు వెంటాడుతాయన్నారు. ఒకరకంగా రిలీజ్‌కు ముందే సినిమా చూపించి నాగార్జున తనకు పరీక్ష పెట్టాడన్న తరహాలో చిరంజీవి వ్యాఖ్యలు చేశారు.

ఆల్ క్లాస్ సినిమా

సినిమా చూసి ఎలా స్పందించాలో తెలియలేదని, కానీ ఒక అద్భుతమైన, స్వచ్చమైన ప్రేమ కథను చూసిన ఫీలింగ్ కలిగిందన్నారు. క్లాస్, మాస్ అందరినీ ఆకట్టుకునేలా 'హలో' సినిమా ఆల్ క్లాస్ సినిమా అవుతుందన్నారు.

అప్పుడే ఆశ్చర్యపోయాను:

తాను అఖిల్ మొదటి సినిమా చూసినప్పుడే అతని పెర్ఫామెన్స్ చూసి ఆశ్చర్యపోయానని చిరంజీవి అన్నారు. ఇక 'హలో' విషయానికొస్తే నటుడిగా అఖిల్ అద్భుతంగా నటించాడన్నారు. ఈ సినిమా ప్రతీ ఒక్కరి గుండెను తాకుతుందన్నారు.

తండ్రిని మంచిన తనయుడు:

అఖిల్ గురించి చెబుతూ.. అతనిలో తాత గారి జీన్స్ ఉన్నాయన్నారు చిరంజీవి. అఖిల్ అటు తాతను, ఇటు తండ్రిని మించిన తనయుడు అయ్యాడని పేర్కొనడం విశేషం.