మిత్రుడ్ని కాపాడండి!

By Staff

Published: Sunday, May 10, 2009, 13:31 [IST]

బాలకృష్ణ,ప్రియమణి కాంబినేషన్లో నూతన దర్శకుడు మహదేవ్ రూపొందించిన మిత్రుడు చిత్రాన్ని పైరసీ నుంచి కాపాడమంటున్నారు నిర్మాత. 'మిత్రుడు" సినిమా విడుదలై వారం రోజులైనా కాకముందే, హైద్రాబాద్‌ నగరం నడిబొడ్డున ఆ చిత్రం వీడియో పైరేటెడ్‌ సీడీలు, పలు కాంబినేషన్స్‌లో కుప్పలు తెప్పలుగా ప్రత్యక్షం కావడం జరిగింది. దాంతో తెలుగు చిత్ర పరిశ్రమ ఎదుర్కొంటున్న దుస్థితికి ప్రత్యక్ష్య నిదర్శనమంటూ ఒక ఏరియాలో 300 పైగా 'మిత్రుడు" పైరేటెడ్‌ వీడియో సిడీలను పట్టుకుని వాటిని మీడియాకు ప్రదర్శించారు చిత్ర నిర్మాత శివలెంక కృష్ణప్రసాద్‌.

ఈ సందర్భంగా ఆయన మీడియాతో మాట్లాడుతూ ''మిత్రుడు" విడుదలైన మూడో రోజునుంచే పైరేటెడ్‌ సిడీలు మార్కెట్‌లో లభ్యమవుతున్నాయని మాకు తెలిసింది. పదిమంది మనుష్యులను రెండు రోజులు నిఘా పెడితే ఈ రోజు పట్టుపడ్డాయి. దానినిబట్టి ఈ మార్కెట్‌కు సంబంధించిన నెట్‌వర్క్‌ ఎంత బలంగా ఉందన్నది అర్ధమవుతుంది. ఇప్పటికైనా ప్రభుత్వం స్పందించి కఠిన చర్యలు తీసుకోకపోతే పరిశ్రమ మనుగడ సాగించడం కష్టమైపోతుంది. 'మిత్రుడు" సినిమా మంచి రిపోర్ట్‌తో రోజురోజుకూ కలెక్షన్లు పెంచుకుంటూ విజయపధంలో దూసుకుపోతున్న తరుణంలో ఈ పైరసీ బెడద ఎక్కువైపోవడం బాధాకరం..మిత్రుడుని పైరసీ నుంచి కాపాడండి "" అన్నారు.

More from Filmibeat