దెబ్బకు దెబ్బ.. కోతకు కోత.. పవన్ కల్యాణ్‌ వారాహి యాత్రకు బాలకృష్ణ మద్దతు

పవర్ స్టార్, జనసేన అధినేత పవన్ కల్యాణ్ మరోసారి జనంలోకి వెళ్లేందుకు సిద్దమయ్యాడు. ఆంధ్ర ప్రదేశ్‌లో నాలుగు విడుత వారాహి విజయ యాత్రను ప్రారంభించనున్నారు. తెలుగు దేశం అధినేత చంద్రబాబు నాయుడు అరెస్ట్ తర్వాత ఈ యాత్ర ప్రారంభిస్తుండటంతో మరింత ఆసక్తిని రేపుతున్నది. ఈ క్రమంలో పవన్ కల్యాణ్ చేపట్టనున్న వారాహి విజయ యాత్రకు తెలుగుదేశం పార్టీ నేత, ఎమ్మెల్యే నందమూరి బాలకృష్ణ మద్దతు ప్రకటించారు. ఈ సందర్బంగా ఏర్పాటు చేసిన ప్రెస్ మీట్‌లో మాట్లాడుతూ..

నా సోదరుడు, జనసేన పార్టీ అధ్యక్షులు పవన్ కల్యాణ్ నాలుగో విడుత వారాహి విజయయాత్రను ప్రారంభిస్తున్నారు.సెప్టెంబర్ 30వ తేదీన ప్రారంభిస్తున్న ఆయన యాత్రకు పూర్తి మద్దతు తెలియజేస్తున్నాం. దెబ్బకు దెబ్బ.. కోతకు కోత ఉంటుంది. కేసులకు, కోర్టులు, జైలు శిక్షకు భయపడేది లేదు. అవినీతి చేయని వాడు దేవుడికి కూడా భయపడడు. సమాజమే దేవాలయం.. ప్రజలే దేవుళ్లు అని నాన్న నందమూరి తారక రామారావు చెప్పిన మాటలను పూర్తిగా విశ్వసిస్తాం అని బాలకృష్ణ అన్నారు.

ఇక నందమూరి బాలకృష్ణ తన ప్రసంగంలో ఏపీ మంత్రి అంబటి రాంబాబుపై తీవ్రస్థాయిలో మండిపడ్డారు. అసెంబ్లీ తొడగొట్టి మీసం తిప్పితే.. వెళ్లి సినిమాల్లో చేసుకో.. ఇక్కడ కాదు అని నా వృత్తిని అవమానించాడు. అతడు మీసం తిప్పితే.. రా తేల్చుకొందాం అని నేను మీసం మెలేసీ.. తొడగొట్టాను. రా తేల్చుకొందామని సవాల్ విసిరాను. నేను ఎవరికి భయపడే వాళ్లం కాదు. ప్రజా క్షేత్రంలో తేల్చుకొంటాం అని బాలకృష్ణ అన్నారు.

అమరావతి రాజధాని కోసం నిరాహార దీక్షలు చేసిన వారిని పెయిడ్ ఆర్టిస్టులని ఐటీ మంత్రి అన్నారు. అయితే ఐటీ కాంక్లేవ్ పేరుతో నిర్వహించిన సమావేశానికి వచ్చిన వారందరూ జూనియర్ ఆర్టిస్టులు కాదా? అని బాలయ్య ప్రశ్నించారు. ఉపాధి కోసం స్కిల్ డెవలప్‌మెంట్ ప్రొగ్రాం పెడితే.. అవినీతి జరిగిందని సాక్ష్యాలు లేకుండా చంద్రబాబును జైల్లో పెట్టారు. కేసులు, కోర్టులు, అరెస్ట్‌లకు భయపడేది లేదు అని బాలకృష్ణ అన్నారు.

ఇదిలా ఉండగా, పవన్ కల్యాణ్ గత కొద్ది రోజులుగా ఉస్తాద్ భగత్ సింగ్ సినిమా ఓ షెడ్యూల్‌ను పూర్తి చేసుకొన్నారు. పవన్ కల్యాణ్, కీలక నటులపై పవర్‌ఫుల్ యాక్షన్ ఎపిసోడ్స్‌ను దర్శకుడు హరీష్ శంకర్ పూర్తి చేసినట్టు మైత్రీ మూవీ మేకర్స్ అధికారికంగా వెల్లడించింది. ఈ నేపథ్యంలో ఉస్తాద్ భగత్ సింగ్ షూటింగ్‌కు కొంత విరామం ప్రకటించి.. నాలుగో విడుత వారాహి విజయ యాత్రను సెప్టెంబర్ 31వ తేదీ నుంచి ప్రారంభించనున్నారు.