తాగి పిచ్చి వేషాలు వేస్తూ అమ్మాయిల జోలికొస్తే మక్కెలు ఇరుగుతాయ్: పవన్ కళ్యాణ్

కఠినమైన చట్టాలు ఉండాలి

చాలా మందిని నేను మద్యం నిషేదం గురించి అడిగాను. ఇదే మధ్యం షాపులు విదేశాల్లో ఉంటాయి. యూరఫ్ వెళితే ఏ మూలకు వెళ్లినా బార్ ఉంటుంది. కానీ వారు మద్యం తీసుకుని రోడ్డు మీదకు ఎక్కాలంటే, డ్రైవింగ్ చేయాలంటే వణికిపోతారు. పోలీసులకు దొరికితే లైఫ్ టైమ్ వారికి డ్రైవింగ్ చేయడానికి వీల్లేకుండా చేస్తారు. ఆన్ డ్యూటీ దొరికితే ఉద్యోగాల్లో నుంచి తీసేస్తారు. అంత కట్టుదిట్టమైన చట్టాలుంటాయని చెప్పారు.

బెల్టు షాపులు బ్యాన్ చేస్తాం

మరికొంత మంది.. నువ్వు ఏం తాగావన్నది కాదు.. ఏం చేశావన్నది, ఏం మాట్లాడావన్నది ముఖ్యం అంటూ మరో లాజిక్ చెబుతారు. ఇవన్నీ దృష్టిలో పెట్టుకుని బెల్టు షాపులను కంప్లీగ్‌గా బ్యాన్ చేయాలనే నిర్ణయానికి వచ్చాను. దీన్ని నేను మనస్పూర్తిగా పాటిస్తాను.

ఒక్కరోజులో అద్భుతాలు జరుగవు, నాకు చేతనైంది చేస్తాను

ఒక్క రోజులో నేను చాలా చేసేయగలను అని మీరందరూ నా నుంచి ఎక్కువ అద్భుతాలు ఆశించవచ్చేమో? కానీ మీ బాధను, వేదనను అర్థం చేసుకోగలను. నాకు చేతనైంది కచ్చితంగా చేస్తాను. అందులో భాగంగా బెల్టు షాపులను నిషేధించడం తప్పకుండా చేస్తాను.

పూర్తిగా బ్యాన్ చేస్తే కొత్త సమస్యలు

పూర్తిగా బ్యాన్ చేయడం వల్ల కూడా కొన్ని సమస్యలు వస్తాయి. పక్కరాష్ట్రాల్లో మన కంట్రోల్ ఉండదు. అక్కడి నుంచి ఇక్కడికి మద్యం వస్తుంది. దాని వల్ల కొత్త మాఫియా వస్తుంది. రౌడీలు వస్తారు, దానికో మార్కెట్ తయారవుతుంది. ఎన్టీ రామారావుగారు మద్య నిషేదం పెట్టినపుడు కొంత మంది సికింద్రాబాద్, కంటోన్మెంట్ ఏరియాకు వెళ్లి ఆర్మీవాళ్లు ఇస్తారేమో అని ఎదురు చూసేవారు. బంగారం స్మగ్లింగ్, ఆర్డీఎక్స్ స్మగ్లింగ్ మాదిరిగా చేసేవారు. అందుకే కంప్లీట్ నిషేదం అనేది సాధ్యపడక పోవచ్చు.

తాగి పిచ్చి వేషాలు వేస్తూ అమ్మాయిల జోలికొస్తే మక్కెలు ఇరుగుతాయ్

మా నాన్న ఆబ్కారీ శాఖలో పని చేసిన వ్యక్తి. నాకు ఉన్న అనుభవం దృష్టిలో పెట్టుకుని రెస్పాన్సిబుల్ లిక్కర్ పాలసీ తీసుకురావాలనుకుంటున్నాను. ఎవరైనా తాగి పిచ్చిగా రోడ్ల మీదకు వస్తే జైల్లో పెట్టడం లాంటి స్ట్రాంగ్ పనిష్మెంట్ ఉండాలి. ఆడ పిల్లల జోలికి వస్తే తిరిగి మాట్లాడకుండా, బయటకు రాకుండా తన్నిలోపల వేయాలి. తాగితే తాగు.. ఇంట్లో ఏమన్నా చేసుకో. బయటకు వచ్చి పిచ్చి వేషాలు వేస్తే మక్కెలు ఇరగ్గొడతాం. అలాంటి బలమైన చట్టాలు తేవాలి. అలాంటి బలమైన చట్టాలు తెచ్చిన తర్వాతే నేను మద్యం గురించి మాట్లాడతాను. ఇది నేను మీకు ఇచ్చే భరోసా.. అని పవన్ కళ్యాణ్ వ్యాఖ్యానించారు.