Bheemla Nayak OTT: చరిత్ర సృష్టించిన భీమ్లా నాయక్.. ఇండియాలోనే తొలి సినిమాగా రికార్డు

బిగ్ మల్టీస్టారర్‌గా ‘భీమ్లా నాయక్'

పవన్ కల్యాణ్, దగ్గుబాటి రానా ప్రధాన పాత్రల్లో వచ్చిన మల్టీస్టారర్ మూవీనే 'భీమ్లా నాయక్'. సాగర్ కే చంద్ర రూపొందించిన ఈ సినిమాను సూర్యదేవర నాగవంశీ నిర్మించాడు. ఈ మూవీలో నిత్య మీనన్, సంయుక్త మీనన్ హీరోయిన్లుగా నటించారు. ఈ మూవీకి థమన్ సంగీతాన్ని అందించాడు. త్రివిక్రమ్ శ్రీనివాస్ ఈ చిత్రానికి దర్శకత్వ పర్యవేక్షణతో పాటు మాటలను కూడా రాశారు.

ప్రపంచ వ్యాప్తంగా బిజినెస్ ఇలా

మల్టీ స్టారర్‌గా రూపొందిన 'భీమ్లా నాయక్' మూవీకి తెలుగు రాష్ట్రాల్లో కలిసి రూ. 88.75 కోట్ల ప్రీ రిలీజ్ బిజినెస్ అయింది. అలాగే, రెస్టాఫ్ ఇండియా హక్కులు రూ. 9 కోట్లకు, ఓవర్సీస్ హక్కులు రూ. 9 కోట్లకు అమ్ముడుపోయాయి. దీంతో ఈ ప్రతిష్టాత్మక చిత్రం ప్రపంచ వ్యాప్తంగా అన్ని ఏరియాల్లో కలిపి రూ. 106.75 కోట్లు బిజినెస్‌ను చేసుకుందని ట్రేడ్ వర్గాలు తెలిపాయి.

ప్రపంచ వ్యాప్తంగా వచ్చిందెంత?

ఆంధ్రా, తెలంగాణలో ఫుల్ రన్‌లో 'భీమ్లా నాయక్' రూ. 76.84 కోట్లు వసూలు చేసింది. మిగిలిన ప్రాంతాల్లో నిరాశనే ఎదుర్కొంది. ఫలితంగా కర్నాటక ప్లస్ రెస్టాఫ్ ఇండియాలో రూ. 8.24 కోట్లు, ఓవర్సీస్‌లో రూ. 12.55 కోట్లు కలెక్ట్ చేసింది. దీంతో ముగింపు సమయానికి ఈ సినిమాకు ప్రపంచ వ్యాప్తంగా రూ. 97.63 కోట్లు షేర్‌తో పాటు రూ. 159.10 కోట్ల గ్రాస్ వచ్చింది.

బ్రేక్ ఈవెన్ టార్గెట్.. ఫలితం ఇలా

ఎంతో ప్రతిష్టాత్మకంగా రూపొందిన 'భీమ్లా నాయక్'కు ప్రపంచ వ్యాప్తంగా రూ. 106.75 కోట్లు మేర బిజినెస్ జరిగినట్లు ట్రేడ్ వర్గాలు తెలిపాయి. దీంతో బ్రేక్ ఈవెన్ టార్గెట్ రూ. 108 కోట్లుగా నమోదైంది. ఇక, ఈ సినిమా ఫుల్ రన్‌లోనే రూ. 97.63 కోట్లు వసూలు చేసింది. అంటే ఈ సినిమా ద్వారా రూ. 10.37 కోట్లు నష్టం వచ్చింది. దీనికి కారణం టికెట్ల రేట్లే అన్నది తెలిసిందే.

ఆ 2 ఓటీటీల్లో స్ట్రీమింగ్ మొదలు

పవన్ కల్యాణ్ - దగ్గుబాటి రానా కాంబోలో రూపొందిన 'భీమ్లా నాయక్' మూవీ నేటి నుంచే (మార్చి 24) స్ట్రీమింగ్ మొదలైంది. దీని హక్కులను సంయుక్తంగా కొనుగోలు చేసుకున్న రెండు ఓటీటీ సంస్థలు డిస్నీ ప్లస్ హాట్‌స్టార్, ఆహా స్ట్రీమింగ్ మొదలు పెట్టాయి. దీంతో చాలా థియేటర్లలో ఈ సినిమా రన్ ఆగిపోయింది. ఇక, ఓటీటీల్లోనూ ఈ సినిమాకు భారీ రెస్పాన్స్ వస్తున్నట్లు తెలుస్తోంది.

ఆహాలో చరిత్ర సృష్టించిన మూవీ

'భీమ్లా నాయక్'కు ఆహాలో భారీ స్పందన దక్కుతోంది. ఈ విషయాన్ని సదరు సంస్థ అధికారికంగా వెల్లడించింది. అంతేకాదు, ఇది తక్కువ సమయంలోనే 100 మిలియన్ స్ట్రీమింగ్ మినిట్స్‌ను కూడా పూర్తి చేసుకుంది. తద్వారా ఆహాలో ఈ ఘనతను అందుకున్న మొదటి ఇండియన్ చిత్రంగా రికార్డు క్రియేట్ చేసింది. దీంతో చిత్ర యూనిట్‌తో పాటు ఆహా టీమ్ ఫుల్ ఖుషీగా ఉంది.