HBD Pawan Kalyan: థియేటర్లలో పవన్ కల్యాణ్​ ఫ్యాన్స్ బీభత్సం.. జరిగిన నష్టం ఎంతంటే?

తగ్గని క్రేజ్​..

అక్కడ అమ్మాయి ఇక్కడ అబ్బాయి సినిమాతో హీరోగా ఎంట్రీ ఇచ్చిన పవర్​ స్టార్​ పవన్ కల్యాణ్​ ఆద్యంత తనదైన స్టైల్​తో, డ్యాన్స్​లతో, డైలాగ్​లతో, మ్యానరిజంతో ప్రేక్షకులను, అభిమానులను ఆకట్టుకున్నాడు. అశేష అభిమానగనాన్ని సంపాదించుకున్న స్టార్​గా పవన్​ కల్యాణ్​ నిలిచాడు. సినిమా హిట్​ అయన, ఫ్లాప్​ అయినా పవన్​ కల్యాణ్​కు ఉన్న క్రేజ్​ ఏమాత్రం తగ్గలేదు.

27 సినిమాలు..

పవన్​ కల్యాణ్ చివరిగా నటించిన చిత్రం భీమ్లా నాయక్​. ఈ సినిమా వరకు ఇప్పటికి 27 సినిమాలు చేశాడు పవన్ కల్యాణ్​. అందులో విజయాలకంటే అపజయాలు ఎక్కువగా ఉన్నాయని చెప్పవచ్చు. అయినా పవన్ కల్యాణ్​ క్రేజ్ ఎక్కడ తగ్గలేదు. హిట్టు, ఫ్లాప్​లకు సంబంధం లేకుండా సినిమా సినిమాకు ఆయన మార్కెట్​ పెరుగుతూనే వచ్చింది. ఎంతోమంది అభిమానుల మనసు గెలుచుకున్న పవన్ కల్యాణ్ బర్త్​డే ఇవాళ.

ఫ్యాన్స్​ హంగామా..

ఆయన పుట్టిన రోజు సందర్భంగా వేడుకలు అక్కడక్కడ ఘనంగా జరుగుతున్నాయి. పలు చోట్ల ఆయన సూపర్​ హిట్​ మూవీ జల్సా థియేటర్లలో ప్రదర్శితమవుతున్న విషయం తెలిసిందే. ఇదిలా ఉంటే ఆయన ఫ్యాన్స్​ కొందరు బీభత్సం సృష్టించారు. వైజాగ్​లోని లీలా మహాల్​ థియేటర్​లో జల్సా మూవీ ఫస్ట్​ అండ్ సెకండ్​ షోను ప్రదర్శించారు. అయితే ఈ థియేటర్​లో పవన్​ కల్యాణ్​ ఫ్యాన్స్​ నానా హంగామా చేసినట్లు సమాచారం.

థియేటర్​ ధ్వంసం..

బీర్​ బాటిల్స్​ పగలకొట్టి స్క్రీన్​ చించేశారు. సీట్లు ధ్వంసం చేయడంతో పాటు సీలింగ్​ సైతం డ్యామేజ్ చేశారు. పేపర్​ ముక్కలు, గాజు పెంకులతో ప్రస్తుతం థియేటర్​ పరిస్థితి అద్వాన్నంగా తయారైనట్లు తెలుస్తోంది. దీంతో ఆ థియేటర్​ యాజామాన్యం గగ్గోలు పెడుతోంది. సుమారు రూ. 20 లక్షల నష్టం వచ్చినట్లు సమాచారం. ఇదేకాకుండా మరో చోట ఇలాంటి పరిస్థితే ఏర్పడింది.

సౌండ్ సిస్టం సరిగా లేదని..

కర్నూల్​లోని శ్రీరామ థియేటర్​లో జల్సా సినిమా చూసేందుకు అభిమానులు భారీ ఎత్తున వచ్చారు. అయితే థియేటర్​లో సౌండ్ సిస్టం సరిగా లేదని ఫ్యాన్స్​ ఆందోళనకు దిగినట్లు తెలుస్తోంది. సహనం కోల్పోయిన పవన్ ఫ్యాన్స్​ థియేటర్​పై రాళ్లు రువ్వడంతో అద్దాలు ధ్వంసమయ్యాయి. ఈ ఘటనతో థియేటర్​ వద్ద ఉద్రిక్త పరిస్థితులు నెలకొన్నాయి. దీంతో పోలీసులు చేరుకుని పలువురిపై కేసు నమోదు చేసి దర్యాప్తు చేస్తున్నట్లు సమాచారం.