'జానీ' సినిమాలో లోపం అక్కడే జరిగింది.. అందుకే.. పవన్ కళ్యాణ్

హైదరాబాద్ ఫిల్మ్ ఛాంబర్‌లో పవన్

ప్రముఖ రచయిత, పత్రికా సంపాదకుడు, రాజకీయ విశ్లేషకుడు తెలకపల్లి రవి రాసిన ‘మన సినిమాలు, అనుభవాలు - చరిత్ర - పరిణామం' పుస్తక ఆవిష్కరణ మహోత్సవానికి చీఫ్ గెస్ట్ గా విచ్చేశారు పవన్. నిన్న (మంగళవారం) హైదరాబాద్ ఫిల్మ్ ఛాంబర్ లో ఈ పుస్తకావిష్కరణ మహోత్సవం ఘనంగా జరిగింది. ఈ వేదికపై మాట్లాడిన పవన్.. తన జానీ సినిమా పరాజయం గుర్తుచేస్తూ దానికి కారణాలు కూడా చెప్పారు.

2003లో భారీ అంచనాల నడుమ జానీ

2003 సంవత్సరం కల్లా తెలుగు సినీ పరిశ్రమలో స్టార్ హీరోగా అశేష అభిమాన వర్గాన్ని సొంతం చేసుకున్నారు పవన్ కళ్యాణ్. ఈ నేపథ్యంలో భారీ అంచనాల నడుమ విడుదలైన 'జానీ' ఆశించిన ఫలితం అందుకోలేక పోయింది. ఈ సినిమాలో పవన్, రేణు దేశాయ్ జంటగా నటించారు. మార్షల్ ఆర్ట్స్ కోచ్‌గా పవన్ నటించారు.

'జానీ' ఎందుకాడలేదో తెలుసు

తాజాగా జరిగిన ఈ కార్యక్రమంలో జానీ సినిమా డిజాస్టర్ గురించి పవన్ ప్రస్తావిస్తూ.. ఈ సినిమా ఎందుకాడలేదో తనకు బాగా తెలుసని పేర్కొన్నాడు. కమర్షియల్ యాంగిల్‌లో సినిమాను తెరకెక్కించాలనే కోణంలో ఆలోచించి అనుకున్న కథను తెరకెక్కించలేకపోయానని అందుకే ఆ సినిమా బాక్సాఫీస్ వద్ద విఫలం చెందిందని పవన్ చెప్పారు.

మహానటి అవార్డు రావడం పట్ల ఆనందం

ఇటీవలే 'మహానటి' సినిమా జాతీయ అవార్డు గెలుచుకోవడం పట్ల తన ఆనందాన్ని వ్యక్తం చేశారు పవన్. మహానటి సావిత్రి బయోపిక్ తీస్తేనేగానీ ఆమె సామర్ధ్యం, పడిన కష్టం ప్రేక్షక లోకానికి తెలిసిందని, సినిమాలు నిజ జీవితాన్ని ఎంత ప్రభావితం చేస్తాయో.. నిజ జీవితాలు కూడా సినిమాలను అంతే ప్రభావితం చేస్తాయని పవన్ పేర్కొన్నాడు. ఇలాంటి గొప్ప సినిమాలకు జాతీయ అవార్డు రావడం ఆనందం కలిగించిందని పవన్ చెప్పారు.

తెలుగు సినిమాలపై మమకారం

తెలకపల్లి రవి రాసిన ‘మన సినిమాలు, అనుభవాలు - చరిత్ర - పరిణామం'లో ఆయన సినీ జీవితాల్లోని చాలా విషయాలు ప్రస్తావించారని అన్నారు పవన్. ఇలాంటి పుస్తకాలు ముందు ముందు మరిన్ని రావాలని, తెలుగు సినిమా చరిత్రను మరింత ముందుకు తీసుకెళ్లాలని, ఈ విషయంలో తన వంతు సహకారం అందిస్తానని పవన్ అన్నారు.