రాజమౌళి ఆదేశం: ఆ సినిమా క్యాన్సిల్ చేసుకున్న ప్రభాస్!

హైదరాబాద్: ‘బాహుబలి' ఫలితాలతో చాలా హ్యాపీగా ఉన్న ప్రభాస్ సక్సెస్‌ను ఎంజాయ్ చేస్తున్నాడు. ఇన్నాళ్లు షూటింగ్, ప్రమోషన్లతో బిజీగా ఉన్న యంగ్ రెబల్ స్టార్ ప్రస్తుతం రిలాక్స్ అవుతున్నాడు. బాహుబలి-2 కంటే ముందు ప్రభాస్ ఓ సినిమా చేయాలని నిర్ణయించుకున్న సంగతి తెలిసిందే. అయితే తాజాగా ప్రభాస్ ఆ నిర్ణయం విరమించుకున్నట్లు తెలుస్తోంది.

‘రన్ రాజా రన్' ఫేం సుజీత్ ఆ మధ్య ప్రభాస్‌కి ఓ యాక్షన్ సబ్జెక్టుతో కూడిన కథ చెప్పి ప్రభాస్ నుండి గ్రీన్ సిగ్నల్ తీసుకున్నాడు. వాస్తవానికి ‘బాహుబలి-ది బిగినింగ్' విడుదలైన వెంటనే...‘బాహుబలి-2' మొదలయ్యే గ్యాపులోసుజీత్ దర్శకత్వంలో మిర్చి నిర్మాతలతో ఈ యాక్షన్ ఎంటర్టెనర్ చేయాలనుకున్నాడు ప్రభాస్. ఆగస్టు నుండి ఈ సినిమా ప్రారంభం కావాల్సి ఉంది.

అయితే తాజాగా ప్రభాస్ ప్లాన్ మారినట్లు తెలుస్తోంది. సెప్టెంబర్ నుండి ‘బాహుబలి-2' షూటింగ్ ఉంటుందని, రెడీగా ఉండాలని రాజమౌళి చెప్పడంతో సుజీత్‌తో చేయాల్సిన సినిమాను క్యాన్సిల్ చేసుకున్నట్లు తెలుస్తోంది. ఈ సినిమా మొదలు పెడితే ‘బాహుబలి-2' మొదలయ్యే సమయానికి అది పూర్తయ్యే అవకాశం లేక పోవడంతో ఈ నిర్ణయం తీసుకున్నట్లు సమాచారం.