లారెన్స్ కారణంగా ప్రభాస్ ‘రెబెల్’ వాయిదా..?

యంగ్ రెబెల్ స్టార్ ప్రభాస్ రాబోయే చిత్రం 'రెబెల్" వచ్చే వేసవికి వాయిదా పడే సూచనలు కనిపిస్తున్నాయి. అనుష్క కారణంగా కొన్ని రోజులు వాయిదాపడ్డ ఈ సినిమా షూటింగ్ ఆ స్థానంలో తమన్నా ఎంటర్ అవడంతో తిరిగి ప్రారంభమైన విషయం తెలిసిందే ప్రస్తుతం నిర్విరామంగా షూటింగ్ జరుపుకుంటున్న ఈ చిత్రాన్ని జనవరి 2012లో విడుదల చేసేందుకు ప్రణాళికను రూపొందిస్తున్నారు. ఆ మేరకే షూటింగ్ షెడ్యూల్ ప్లాన్ చేస్తున్నారు.

అయితే, ఈ చిత్ర దర్శకుడు రాఘవ లారెన్స్ కొన్ని వారాలపాటు అనారోగ్యంతో ఉన్న కారణంగానే ఈ చిత్ర షూటింగ్ వాయిదా పడిందంటూ గత రెండు మూడు రోజుల నుండి పలు వెబ్ సైట్స్ లో వార్తలు షికారు చేస్తున్నాయి. లారెన్స్ పూర్తిగా కోలుకోవటంతో ఈ సినిమా వేసవిలో తెరపైకి వస్తుందని భావిస్తున్నారు.

ఈ చిత్రంలో ప్రభాస్ , తమన్న మరియు దీక్ష సేథ్ ప్రధాన తారాగణం.'రెబల్" చిత్రాన్ని శ్రీ బాలాజీ సినీ మీడియా పతాకంపై జె. భగవాన్, జె. పుల్లారావు నిర్మిస్తున్నారు. తమన్ ఈ చిత్రానికి మ్యూజిక్ అందిస్తున్నారు. రెబల్ స్టార్ కృష్ణంరాజు, ప్రభాస్ తండ్రి పాత్రను పోషిస్తున్నారు. కెల్లీ దోర్జీ, షాయాజీ షిండే, జయప్రకాశ్ రెడ్డి, చలపతి రావు, బ్రహ్మానందం, ఆలీ మరియు ఎంఎస్ నారాయణ ఇతర ముఖ్య పాత్రలు చేస్తున్నారు.