హోమ్

న్యూస్

హైదరాబాద్: ప్రముఖ బాక్సింగ్ క్రీడాకారిణి మేరీకోమ్ జీవిత కథ ఆధారంగా తెరకెక్కిన ‘మేరీకోమ్' చిత్రం ఇటీవల విడుదలై విమర్శకుల ప్రశంసలు అందుకుంటోంది. ఈ చిత్రంలో ప్రియాంక చోప్రా పెర్ఫార్మెన్స్ చూసి అంతా అభినందనల వర్షం కురిపిస్తున్నారు. తాజాగా ‘మేరీకోమ్' చిత్రాన్ని చూసిన శిల్పా శెట్టి కంటతడి పెట్టింది. మేరీకోమ్ జీవితంలోని వివిధ కోణాలను, కష్టనష్టాలను ఆవిష్కరించిన ఈ చిత్రం చూసిన తర్వాత ఆమె భావేద్వానికి గురయి కంటతడి పెట్టారు.

ఈ విషయాన్ని శిల్పా శెట్టి తన ట్విట్టర్లో వెల్లడిస్తూ...‘మేరీకోమ్ చిత్రంలో అందరూ బాగా నటించారు. కానీ ప్రియాంక చోప్రా పెర్పార్మెన్స్ అద్భుతం. పాత్రలో జీవించింది. ఓమంగ్ దర్శకత్వం బాగుంది. సినిమా చూసిన తర్వాత నా కళ్లు చెమర్చాయి. ఇది తప్పకుండా ప్రతి ఒక్కరూ చూడాల్సిన సినిమా' అంటూ శిల్పా శెట్టి ట్వీట్ చేసింది.

ఈ చిత్రం కోసం ప్రియాంక చోప్రా చాలా కష్ట పడింది. మేరీ కోమ్ పాత్రలో జీవించడానికి స్వయంగా బాక్సింగ్ శిక్షణ తీసుకోవడంతో పాటు, మేరీ కోమ్‌తో పాటు కొన్ని రోజులు ఉండి మెళకువలు నేర్చుకుంది. మణిపూర్ ప్రాంతంలోని పల్లెటూరుకు చెందిన అమ్మాయి మేరీ కోమ్(ప్రియాంక చోప్రా). బాక్సింగ్ అంటే ఆసక్తి. తాను కూడా గొప్ప బాక్సర్ కావాలని, దేశానికి ఒలంపిక్ మెడల్ సాధించాలని కలలు కంటూ ఉంటుంది. బాక్సింగ్ అంటేనే పురుషాధిప్యం ఉన్న క్రీడ. అలాంటి క్రీడలో అమ్మాయిలు ఎంటరవ్వడం అంటే మామూలు విషయం కాదు. దీంతో ఇటు ఇంట్లో, అటు సమాజంలోని పరిస్థితులు ఆమెను పూర్తిగా నిరాశకు గురి చేస్తాయి. ఆ క్రీడ వైపు వెళ్లడానికి తండ్రి నిరాకరిస్తాడు. తండ్రిని ఎదురించి బాక్సింగ్ రింగులోకి ఎంటరైన తర్వాత ఎన్నో అవామానాలు, ఆటు పోట్లు. చివరకు ఆమె లక్ష్యాన్ని ఎలా చేరుకుంది అనేది ఈ చిత్రం.