లిరిక్ రైటర్ కి పూరీ జగన్నాథ్ కాస్ట్ లీ గిఫ్ట్

హైదరాబాద్ : ఆ మధ్య ఎన్టీఆర్‌ దర్శకుడు శ్రీనువైట్లకి చేతిగడియారాన్ని బహుమతిగా ఇచ్చారు. నిర్మాత బండ్ల గణేష్‌ దర్శకుడు పూరి జగన్నాథ్‌కి డైమండ్‌ లైటర్‌ని బహుమతిగా అందజేశారు. ఇప్పుడు పూరి జగన్నాథ్‌ గీతరచయిత భాస్కరభట్ల రవికుమార్‌కి మౌంట్‌ బ్లాక్‌ పెన్నును బహుమతిగా ఇచ్చారు. ఆ పెన్ను ఖరీదు రూ: 1.50లక్షలని సమాచారం.

ప్లాటినమ్‌ డిస్క్‌ వేడుకలో పూరి మాట్లాడుతూ ''నా సినిమాలకి ఇంకా మంచి మంచి పాటలు రాయాలని భాస్కరభట్లకి పెన్ను కొనిచ్చా'' అన్నారు. ''పూరిగారితో పనిచేయడం చాలా బాగుంటుంది. 'హార్ట్‌ఎటాక్‌' రూపంలో మరోసారి ఆయనకి సింగిల్‌కార్డ్‌ గీతాలు రాశాను. ఆయన్నుంచి ఖరీదైన పెన్నును అందుకోవడం ఎంతో ఆనందాన్నిచ్చింది'' అన్నారు భాస్కరభట్ల.

''ఇది వరకు నేను నటించిన సినిమాలు ఏ, బి కేంద్రాల్లో మాత్రమే ఆడాయి. 'హార్ట్‌ ఎటాక్‌'కి సి కేంద్రాల్లో కూడా చక్కటి ఆదరణ దక్కింది. పూరి జగన్నాథ్‌ నాకు మాస్‌ ఇమేజ్‌ని తెచ్చిపెట్టారు. ఆయనతో త్వరలోనే మరో సినిమా చేయబోతున్నా'' అన్నారు నితిన్‌. ఆయన హీరోగా నటించిన చిత్రం 'హార్ట్‌ ఎటాక్‌'. అనూప్‌ రూబెన్స్‌ స్వరాలు సమకూర్చారు. ఇటీవల హైదరాబాద్‌లో ఈ సినిమా ప్లాటినమ్‌ డిస్క్‌ కార్యక్రమం జరిగింది. పూరి జగన్నాథ్‌ చిత్ర బృందానికి జ్ఞాపికలను ప్రదానం చేశారు.

''దర్శక నిర్మాతగా నాకు పూర్తి సంతృప్తినిచ్చిన చిత్రమిది. అనూప్‌ సంగీతం, భాస్కరభట్ల సాహిత్యం చక్కగా కుదిరాయి'' అన్నారు పూరి జగన్నాథ్‌. అనూప్‌రూబెన్స్‌ మాట్లాడుతూ ''పూరిగారితో పూర్తిస్థాయిలో సినిమా చేయడం ఎంతో సంతృప్తినిచ్చింది. తక్కువ సమయంలోనే నాణ్యమైన బాణీల్ని పూరి రాబట్టుకొన్నారు'' అన్నారు. ఈ కార్యక్రమంలో అలీ, భాస్కరభట్ల, రామ్‌లక్ష్మణ్‌, విక్రమ్‌జీత్‌, శేఖర్‌, బ్రహ్మకడలి తదితరులు పాల్గొన్నారు.