వైభవంగా రామ్ చరణ్ తేజ్, ఉపాసన నిశ్చితార్థం

రామ్ చరణ్ తేజ్, ఉపాసనల నిశ్చితార్థం గురువారం రాత్రి వైభవంగా జరిగింది. హైదరాబాదు శివారులోని టెంపుల్ ట్రీజ్ ఫామ్ హౌస్‌లో జరిగిన ఈ నిశ్చితార్థానికి పలువురు రాజకీయ, సినీ ప్రముఖులు హాజరయ్యారు. కార్యక్రమం మొత్తం సంప్రదాయబద్దంగా జరిగింది. సర్వాంగ సుందరంగా అలంకరించిన వేదికపై రామ్ చరణ్, ఉపాసనలు నిశ్చితార్థానికి ఆసీనులయ్యారు. ముహూర్తానికి ఇరు పక్షాలవారు నిశ్చయ తాంబూలాలు ఇచ్చిపుచ్చుకున్నారు. సంప్రదాయ నృత్య, సంగీత కార్యక్రమాలు కూడా ఏర్పాటు చేశారు. హీరో అల్లు అర్జున్ నృత్యం చేస్తూ ఉల్లాసంగా కనిపించారు. చిరంజీవి కూతురు శ్రీజ చరణ్ పక్కనే కనిపించింది.

ముఖ్యమంత్రి కిరణ్ కుమార్ రెడ్డి, ప్రతిపక్ష నాయకుడు నారా చంద్రబాబు నాయుడు, పిసిసి అధ్యక్షుడు బొత్స సత్యనారాయణ, పలువురు రాష్ట్ర మంత్రులు, పార్లమెంటు సభ్యులు నిశ్చితార్థానికి వచ్చారు. అక్కినేని కుటుంబ సభ్యులు వేడుకకు వచ్చారు. బాలకృష్ణ, వెంకటేష్, శ్రీకాంత్, జయసుధ కూడా వచ్చారు. జూనియర్ ఎన్టీఆర్ దంపతులు, మహేష్ బాబు దంపతులు కూడా ఈ నిశ్చితార్థానికి వచ్చారు. ఎంపిక చేసినవారికే ఆహ్వానాలు వెళ్లాయి. రామ్ చరణ్ తేజ్ నిశ్చితార్థం వేడుకలకు భారీ పోలీసు బందోబస్తు ఏర్పాటు చేశారు.