ఎన్టీఆర్ నైట్.. కడపలో మరో సంచలనానికి వర్మ నాంది!

ఎన్టీఆర్ నైట్

వర్మ ట్విట్టర్ లో పేర్కొంటూ.. లక్ష్మీస్ ఎన్టీఆర్ చిత్ర ఆడియో లాంచ్ కడపలో భారీ బహిరంగ సభ ద్వారా చేయబోతున్నాం. ఈ ఈవెంట్ కు వెన్నుపోటు అలియాస్ ఎన్టీఆర్ నైట్ అని పేరు పెట్టాం. ఈవెంట్ నిర్వహించబోయే తేదీని అతి త్వరలోనే ప్రకటిస్తాం అని వర్మ తెలిపాడు. నిజంగా, నిజమైన ఎన్టీఆర్ అభిమానులకు ఈ ఈవెంట్ కోసం స్వాగతం పలుకుతున్నాం అని వర్మ ఓ పోస్టర్ కూడా విడుదల చేశారు.

మరో సంచలనం

ఇప్పటికే లక్ష్మీస్ ఎన్టీఆర్ చిత్రాన్ని ఓ పార్టీకి లబ్ది చేకూర్చడానికి తీస్తున్నారనే విమర్శలని వర్మ ఎదుర్కొంటున్నారు. ఈ చిత్రం వెనుక వైసిపి హస్తం ఉందనే ఆరోపణలు కూడా వినిపిస్తున్నాయి. ఈ తరుణంలో కడపలో లక్ష్మీస్ ఎన్టీఆర్ ఆడియో వేడుక నిర్వహించనుండడం ఆసక్తిగా మారింది. ఆడియో వేడుకతో వర్మ మరో సంచలనానికి నాంది పలకబోతున్నారని అర్థం అవుతోంది.

తీవ్రమైన ఆరోపణలు

ఈ చిత్రాన్ని వర్మ పూర్తిగా లక్ష్మి పార్వతి కోణంలో తెరకెక్కిస్తున్నారు. ఈ నేపథ్యంలో ట్రైలర్ లో చూపిన విధంగా ఎన్టీఆర్ పాత్రతో సంచలన వ్యాఖ్యలు చేయించారు. అవి నేరుగా ఎన్టీఆర్ కురుంబ సభ్యులకే తగిలేలా ఉన్నాయి. బాలయ్య నటించిన ఎన్టీఆర్ బయోపిక్ చిత్రానికి దర్శత్వం వహించేందుకు ముందుగా వర్మకు అవకాశం వచ్చింది. కానీ చివరకు ఆ చిత్రాన్ని క్రిష్ తెరకెక్కించారు. ఆ చిత్రం నుంచి తప్పుకోవడం వల్లే తనకు లక్ష్మీస్ ఎన్టీఆర్ చిత్రీకరించాలనే ఆలోచన వచ్చిందని వర్మ తెలిపారు.

ఎలాంటి అడ్డంకులు లేవు

టిడిపి నేతలు ఇటీవల లక్ష్మీస్ ఎన్టీఆర్ చిత్ర విడుదలని ఎన్నికలు ముగిసే వరకు ఆపాలని ఫిర్యాదు చేశారు. దీనితో లక్ష్మీస్ ఎన్టీఆర్ విడుదలకు అడ్డంకులు తప్పవని అంతా భావించారు. ఎన్నికల సంఘం మాత్రం లక్ష్మీస్ ఎన్టీఆర్ చిత్రంపై ఎలాంటి చర్యలు తీసుకోవడం లేదని తేల్చి చెప్పింది. దీనితో ఈ చిత్ర విడుదలకు అడ్డంకులన్నీ తొలిగిపోయాయి.