రోమాలు నిక్కబొడుచుకుంటాయి, హృదయం కంపిస్తుంది.. అరవింద సమేత వీర రాఘవ!

ఎన్టీఆర్ గురించి చెప్పనవసరం లేదు

దర్శకుడు త్రివిక్రమ్ శ్రీనివాస్ కథకు అనుగుణంగా ఎన్టీఆర్ నటన ఇరగదీస్తాడు అని చెప్పడంలో సందేహం లేదు. ఫస్ట్ లుక్ తోనే ఈ చిత్రంపై అంచనాలు ఆకాశాన్ని తాకేశాయి. సంగీతంపై కూడా అభిమానుల అంచనాలు ఎక్కువగానే ఉంటాయి.

రాయలసీమ నేపథ్యంలో

దర్శకుడు త్రివిక్రమ్ శ్రీనివాస్ తొలిసారి రాయలసీమ బ్యాక్ డ్రాప్ లో తెరకెక్కిస్తున్న చిత్రం ఇది. ఇలాంటి చిత్రానికి సంగీతం, బ్యాగ్గ్రౌండ్ సంగీతం చాలా కీలకం. ఆ పనిని తమన్ చాలా హుషారుగా పూర్తి చేస్తున్నట్లు తెలుస్తోంది. ఈ చిత్రానికి సంబందించిన ప్రతి విషయాన్ని తమన్ సోషల్ మీడియా వేదికగా ఫాన్స్ తో పంచుకుంటున్నాడు.

ఆ బాధ్యతని వాళ్లిద్దరూ

దిగ్గజ పాటల రచయిత సిరివెన్నెల సీతారామశాస్త్రి, సీనియర్ రచయిత రామజోగయ్య శాస్త్రి ఈ చిత్రానికి పాటలు అందిస్తున్నారు. ఇటీవల తనతోపాటు త్రివిక్రమ్, సిరివెన్నెల ఉన్న ఫోటోని తమన్ సోషల్ మీడియాలో పోస్ట్ చేసిన సంగతి తెలిసిందే. తాజాగా రామజోగయ్య శాస్త్రితో ఉన్న ఫోటోని తమన్ షేర్ చేసాడు.

రోమాలు నిక్కబొడుచుకునేలా

తాను ఈ చిత్రంలో ఎలాంటి పాటని రాస్తున్నానో రామజోగయ్య శాస్త్రి చెప్పకనే చెప్పారు. రాఘవ నన్ను వెంటాడుతున్నారు. ఎమోషనల్ సాంగ్ రాస్తున్నా. రోమాలు నిక్కబొడుచుకునేలా, హృదయంలో ప్రకంపనలు రేగేలా, కనీటిధారలు కారేలా ఈ సాంగ్ ఉంటుందని రామజోగయ్య శాస్త్రి తెలిపారు.

పూజా హెగ్డేతో రొమాన్స్

ఎన్టీఆర్ కెరీర్ లోనే భారీ అంచనాలతో తెరకెక్కుతున్న ఈ చిత్రంలో పూజ హెగ్డే హీరోయిన్ గా నటిస్తోంది. హారిక అండ్ హాసిని సంస్థ ఈ చిత్రాన్ని నిర్మిస్తోంది. దసరా కానుకగా ఈ చిత్రాన్ని విడుదల చేయాలనేది వారి ప్లాన్.