అప్పుడేనా...రంభ ఖండన

By Staff

| Published: Wednesday, November 19, 2008, 15:04 [IST]

వాస్తవానికి మూడు పదుల వయసు దాటిన రంభ అందం ఇప్పటికీ చెక్కు చెదరలేదు. గ్లామర్‌గా కనిపించడంలో ఈ తరం హీరోయిన్స్ తో ఆమె పోటీ పడుతూనే వుంది.16 సంవత్సరాల సినీ కెరీర్‌లో 100 సినిమాల వరకు నటించిన రంభ బాలీవుడ్‌లోనూ సల్మాన్‌ఖాన్‌, అజయ్‌ దేవగన్‌, సునీల్‌ శెట్టి, గోవిందా, మిథున్‌ చక్రవర్తి వంటి పేరుపొందిన హీరోల సరసన నటించింది. దివ్యభారతి పోలికలు వుండటం కెరీర్‌ తొలినాళ్లలో ఆమెకు కలసివచ్చింది. అయితే ఆమెకు ఇప్పుడు పేరున్న హీరోల సరసన అవకాశాలు చాలా కాలం నుంచే రావటం లేవు. ప్రస్తుతం మాత్రం ఆమె ప్రకాష్‌రాజ్‌ సరసన తెలుగులో 'ప్రతిక్షణం' అనే సినిమాలో నటిస్తోంది.

వాస్తవానికి ఇది ద్విభాషా చిత్రం. తమిళంలో ఈ చిత్రం 'విడియుమ్‌ వరై కాతిరు' పేరుతో రూపొందుతోంది. ఈ సినిమాతో నాలుగేళ్ల విరామం తర్వాత ఆమె తమిళ ప్రేక్షకులకు కనిపించబోతోంది. తెలుగులో ఇదివరకు 'దొంగ సచ్చినోళ్లు' సినిమాలో హీరోయిన్‌గా నటించాక, ఆమె చేస్తున్న సినిమా 'ప్రతిక్షణం'. సినిమాలు తక్కువై పోవడంతో రంభ టీవీవైపు దృష్టి సారిస్తున్నదనీ, టీవీ సీరియళ్లలో నటించ బోతున్నదనీ ఈమధ్య రూమర్లు వ్యాపించాయి.దీనికి కారణం, తమిళంలో ఆమె ఒక రియాలిటీ షోకి జడ్జిగా వ్యవహరించడం. దీనివల్లే తాను టీవీ సీరియళ్లలో నటించబోతున్నట్లు ప్రచారం జరిగిందనీ, ఇందులో ఏమాత్రం నిజం లేదనీ రంభ తెలిపింది."నన్ను ఉద్వేగానికి గురిచేసే పాత్రలు వస్తే అప్పుడు టీవీ కెరీర్‌ గురించి ఆలోచిస్తా. అది కూడా వెండితెర నుంచి నేను దూరమయ్యాక మాత్రమే'' అని రంభ చెప్పింది.