రవితేజ-గోపీచంద్ మలినేని కాంబినేషన్ మరోసారి

మాస్ మహారాజ రవితేజ, యువ దర్శకుడు గోపీచంద్ మలినేని కాంబినేషన్లో వచ్చిన 'డాన్ శీను' అభిమానులకు మంచి వినోదాన్ని పంచిన విషయం తెలిసిందే. తాజాగా ఈ వీరిద్దరి కాంబినేషన్ మరోసారి రిపీట్ కాబోతోంది. ఇప్పటికే కథా చర్చలు కూడా పూర్తయ్యాయి. ఈ చిత్రాన్ని ప్రసాద్ వి పొట్లూరి పి.వి.పి సినిమాస్ బ్యానర్‌పై నిర్మించనున్నారు. ప్రస్తుతం ఈ నిర్మాత రాజమౌళి దర్శకత్వం వహించిన 'ఈగ' చిత్రం తమిళ వెర్షన్‌ 'నాన్ ఈ'కి నిర్మాతగా వ్యవహరిస్తున్నారు.

రవితేజ-గోపీచంద్ మలినేని కాంబినేషన్ విషయమై రచయిత కోన వెంకట్ తన ట్విట్టర్లో ప్రస్తావిస్తూ...''ఇటీవల గోపీచంద్ మలినేని రవితేజకు బ్యాంకాక్‌లో కథ వినిపంచాడు. వెంటనే రవితేజ ఓకే చెప్పాడు. ఫుల్ ఎంటర్‌టైన్మెంట్ ఎలిమెంట్స్‌తో ఈ చిత్రం రూపొందబోతోంది. రవితేజ సినిమాల్లోనే ఇదో బెస్ట్ సినిమాగా నిలవబోతోంది. ఈ చిత్రం తర్వాత ప్రసాద్ వి పొట్లూరి తెలుగు ఫిల్మ్ ఇండస్ట్రీ మెగా ప్రొడ్యూసర్ల జాబితాలో చేరబోతున్నారు'' అని పేర్కొన్నారు.

ప్రస్తుతం రవితేజ పూరి జగన్నాథ్ దర్శకత్వంలో 'దేవుడు చేసిన మనుషులు' చిత్రంలో నటిస్తున్నాడు. ఈచిత్రం తర్వాత పరశురాం దర్శకత్వంలో ఓ చిత్రానికి కమిట్ అయ్యాడు. వీటితో పాటు మెహర్ రమేష్ చిత్రంలోనూ రవితేజ నటించనున్నట్లు తెలుస్తోంది. ఈచిత్రాలు పూర్తయిన తర్వాత రవితేజ, గోపీచంద్ మలినేని కాంబినేషన్ మొదలయ్యే అవకాశం ఉంది.

డాన్ శ్రీను చిత్రం దర్శుకడిగా కెరీర్ ప్రారంభించిన గోపీచంద్ మలినేని ఆ చిత్రం ద్వారా మంచి పేరు తెచ్చుకోవడమే కాదు, రెండో సినిమా అగ్రహీరో వెంకటేష్‌తో చేసే అవకాశం దక్కించుకున్నాడు. వెంకీతో అతను రూపొందించిన 'బాడీగార్డ్' చిత్రం సంక్రాంతి హిట్ సినిమాల లిస్టులో చేరడంతో గోపీంద్ స్టార్ ఇమేజ్ ఒక్కసారిగా పెరిగి పోయింది.