భారీ సెట్స్ కు 'బై..బై' చెప్పిన గుణశేకర్..క్లాప్ కొట్టిన రాజమౌళి..!?

మామూలుగా గుణశేఖర్ సినిమాలు భారీతనానికి నిదర్శనంగా నిలుస్తాయి. భారీ సెట్లు, భారీ ఖర్చు సినిమా నిండా కనపడతాయి. అయితే, ఈమధ్య కాలంలో తన సినిమాలను (అర్జున్, సైనికుడు, వరుడు) ఆ భారీతనం ఏమాత్రం కాపాడలేకపోయిన విషయాన్ని గుణశేకర్ గ్రహించాడేమో... తాజాగా రూపొందిస్తున్న 'నిప్పు' సినిమాలో ఆ భారీతనానికి, భారీ సెట్స్ కు, గ్రాఫిక్స్ కు స్థానం ఇవ్వడం లేదు. ఈ విషయాన్ని దర్శకుడు గుణశేఖరే స్వయంగా ఈరోజు 'నిప్పు' సినిమా ప్రారంభోత్సవంలో చెప్పి, అందర్నీ ఆశ్చర్యంలో ముంచెత్తాడు!

రవితేజ హీరోగా బొమ్మరిల్లు బ్యానర్ పై దర్శకుడు వై.వి.ఎస్.చౌదరి నిర్మిస్తున్న ఈ చిత్రంషూటింగ్ ఈరోజు ఉదయం హైదరాబాదులోని రామానాయుడు స్టూడియోలో ప్రారంభమైంది. రవితేజపై చిత్రీకరించిన ముహూర్తపు సన్నివేశానికి రాజమౌళి క్లాప్ ఇచ్చారు. రవితేజ బాడీలాంగ్వేజ్ కి తగ్గట్టుగా ఉంటూనే, కొత్తదనంతో అతని పాత్ర సాగుతుందని ఈ సందర్భంగా దర్శకుడు గుణశేఖర్ చెప్పారు. ఈ సినిమాకి ఆకుల శివ సంభాషణలు రాస్తున్నారు. ఇందులో నటించే హీరోయిన్ ఇంకా ఖరారు కాలేదట. సినిమా వచ్చే ఏడాది సంక్రాంతి కి విడుదలయ్యే విధంగా ప్లాన్ చేస్తున్నాము అంటూ త్వరలోనే మిగిలిన వివరాలను తెలియజేస్తానని నిర్మాత వై.వి.ఎస్.చౌదరి చెప్పారు.