పవన్ కళ్యాణ్ ప్లేస్‌లోకి రవితేజ వచ్చాడా..!

సంతోష్ శ్రీనివాస్ దర్శకత్వంలో పవన్ కళ్యాణ్ నటించబోతున్నాడంటూ చాలా కాలం పాటు వార్తలు వచ్చాయి. ప్రముఖ నిర్మాణ సంస్థ మైత్రి మూవీ మేకర్స్ నిర్మాణంలో ఈ సినిమా తెరకెక్కాల్సింది. కానీ పవన్ కళ్యాణ్ రాజకీయాలతో బిజీకావడంతో ఈ కాంబినేషన్ సెట్ కాలేదు. తమిళ బ్లాక్ బాస్టర్ చిత్రం తేరి రీమేక్ గా ఈ చిత్రం తెరకెక్కుతోంది. కథలో కీలక మార్పులు చేసి పవన్ కళ్యాణ్ కు అనుగుణంగా సంతోష్ శ్రీనివాస్ కథ సిద్ధం చేశారు.

పవన్ కళ్యాణ్ ఈ ప్రాజెక్ట్ నుంచి పక్కకు తప్పుకోవడంతో సంతోష్ శ్రీనివాస్ రవితేజతో తెరకెక్కించడానికి సిద్ధం అవుతున్నట్లు వార్తలు వస్తున్నాయి. మైత్రి మూవీ మేకర్స్ సంస్థ ఈ చిత్రాన్ని నిర్మించబోతోంది. తమిళ కథలోని పాయింట్ ని తీసుకున్న సంతోష్ శ్రీనివాస్ దానిని తెలుగు నేటివిటీకి అనుగుణంగా మలిచారు. జులై నుంచి ఈ చిత్రం మొదలయ్యే అవకాశం ఉన్నట్లు తెలుస్తోంది.

కాగా ఈ చిత్రంలో రవితేజ సరసన చందమామ కాజల్ అగర్వాల్ హీరోయిన్ గా ఎంపికైనట్లు తెలుస్తోంది. కాజల్ ఇదివరకే రవితేజతో రెండు చిత్రాల్లో నటించింది. వీర, సారొచ్చారు చిత్రాల్లో కాజల్, రవితేజ జంటగా నటించారు. కేథరిన్ మరో హీరోయిన్ గా ఎంపికైనట్లు తెలుస్తోంది.