'రెడీ'... రెడీ

By Staff

Published: Saturday, March 14, 2026, 3:10 [IST]

విజయవంతమైన ఢీ,దుబాయ్ శ్రీను చిత్రాల తర్వాత దర్శకుడు శ్రీను వైట్ల రూపొందించిన చిత్రం 'రెడీ.. దేనికైనా'. రామ్, జెనీలియా జంటగా ఈ చిత్రం జూన్ 19న విడుదలకు అన్ని ఏర్పాట్లూ పూర్తయ్యాయి. ఈ సినిమాను 160 ప్రింట్లతో రిలీజ్ చేస్తున్నట్లు నిర్మాత స్రవంతి రవికిశోర్ తెలిపారు. దేవిశ్రీ ప్రసాద్ సంగీతం సమకూర్చిన పాటలు ఇప్పటికే ఆదరణ పొందుతున్నాయి. లవ్, యాక్షన్ మేళవింపుతో శ్రీను వైట్ల రూపొందించిన ఈ సినిమాలో పీటర్ హెయిన్స్ సమకూర్చిన ఫైట్స్ హైలైట్ అవుతాయని రవికిశోర్ తెలిపారు. డాన్స్, ఫైట్స్ బాగా చేస్తాడని రామ్ ఇప్పటికే పేరు తెచ్చుకున్నందున ఈ సినిమాలోని పాటలు, ఫైట్లలో అతను బాగా ఆకట్టుకుంటాడని దర్శక,నిర్మాతలు భావిస్తున్నారు.

ఇక 'రెడీ'లో రామ్ బళ్లారికి చెందిన ఇంజనీరింగ్ విధ్యార్థిగా నటించాడు. కథ ప్రకారం అతనిది ఉమ్మడి కుటుంబం. ఒకసారి అతను పనిమీద హైదరాబాదుకు వస్తాడు. అక్కడ జెనీలియా పరిచయమవుతుంది. ఆమె అమెరికా నుంచి వచ్చిన ఎన్నారై అమ్మాయి. అన్ని సినిమాల్లో మాదిరిగానే ఆ ఇద్దరూ ప్రేమలో పడతారు. అయితే ఆమెతో ప్రేమవల్ల చిక్కుల్లో పడతాడు రామ్. వాటిని అతను ఎలా ఎదుర్కొని తన ప్రేమను గెలిచాడనేది కథ. ప్రేమ, యాక్షన్ మిళితమైన ఈ ఫ్యామిలీ డ్రామా బళ్లారి, హైదరాబాద్, వైజాగ్, అరకు, చాలక్కుడి (కేరళ) నేపథ్యాల్లో నడుస్తుంది. ఇప్పటికే రామ్, జెనీలియా, శ్రీను వైట్ల కాంబినేషన్ ప్రేక్షకుల్లో మంచి హైప్ ని క్రియోట్ చేస్తోంది.

More from Filmibeat