మహేష్,నాగ్ లపై విరుచుకు పడ్డ రోజా

By Staff

Published: Tuesday, November 18, 2008, 18:11 [IST]

నంది అవార్డుల పంక్షన్ రాజకీయ సభగా మారిందని విమర్శలు వస్తున్న నేపధ్యంలో రోజా ఆ వ్యాఖ్యలకు సమర్ధనగా కామెంట్ చేసారు. బహిరంగంగా కాంగ్రెస్‌ పార్టీకి మద్దతు ఇస్తే నాగార్జున, మహేష్‌బాబుల సినిమాలకు వసూళ్లు తగ్గుతాయని తెలుగు మహిళ అధ్యక్షురాలు రోజా వ్యాఖ్యానించారు. ఎన్నికలకు ముందే ప్రభుత్వ పథకాలు బాగున్నాయంటూ ఎందుకు గుర్తొచ్చిందో నాగార్జున చెప్పాలని ఆమె డిమాండ్‌ చేశారు. అలాగే ఆమె నాగార్జున టిక్కెట్ రేటు పెంచటంపై హర్షం ప్రకటించటాన్ని కూడా తీవ్రంగా దుయ్యబట్టారు.

సోమవారం తన జన్మదినం సందర్భంగా రోజా టీవీ ఛానళ్లతో మాట్లాడారు. నంది అవార్డుల ప్రధానోత్సవ సభ సినీ పరిశ్రమను విభజించిన సభ అని... అది రాజకీయాలకు వేదికగా మారిందని, సభను చూస్తే రోత పుట్టిందని దుయ్యబట్టారు. సిటీ మంత్రులు ముఖేష్‌గౌడ్‌, షబ్బీర్‌అలీలకు సభలో అసలు ప్రాముఖ్యమే లేదని... వారు పిటీ మంత్రులని ఎద్దేవా చేశారు. తెలుగు మహిళ గర్జనను కూడా త్వరలో నిర్వహిస్తామని ఆమె ప్రకటించారు.ఈ వ్యాఖ్యలు సినీ పరిశ్రమలో చర్చలకు దారితీసాయి.

More from Filmibeat