సినిమాకు సమైక్య సెగ : మనకి మైనస్-వాళ్లకి ప్లస్!

మనకు నష్టాలే

రెండు పెద్ద సినిమాలు, భారీ బడ్జెట్‌తో తెరకెక్కిన చిత్రాలు విడుదల ఆగి పోవడంతో తెలుగు సినీ పరిశ్రమకు నష్టం‌గా పరిణమించింది. ఈ రెండు సినిమాల కోసం ఎప్పటి నుండో డేట్స్, థియేటర్స్ అడ్జెస్ట్ చేసి ప్రణాళికలు తయారు చేసారు. అయితే ఈ చిత్రాల విడుదల ఆగిపోవడంతో డిస్ట్రిబ్యూషన్ వ్యవస్థ అస్తవ్యస్తమైంది.

వాళ్లకి లాభమే

ఈ పరిణామాలు తెలుగు సినిమా పరిశ్రమకు పెద్ద మైనస్‌గా మారితే.....ఇతర బాషా చిత్రాలకు మాత్రం వరంగా మారాయి. ఆగస్టు నెలలో ఏపీలో విడుదలకు సిద్ధమైన పలు తమిళ సిమాలు, హిందీ సినిమాలకు పెద్దగా పోటీ లేకుండా అయిపోయింది. రాష్ట్రంలో నెలకొన్న పరిస్థితులు తమకు కలిసొస్తాయని ఆయా సినీ వర్గాలు భావిస్తున్నాయి.

ఇతర చిత్రాలపైనా ప్రభావం

ఈ రెండు చిత్రాల విడుదల లేట్ కావడంతో భవిష్యత్‌లో విడుదలయ్యే సినిమాలపై కూడా వీటి ప్రభావం పడుతుందని డిస్ట్రిబ్యూటర్లు అంటున్నారు. దీని వల్ల ఇటు నిర్మాతలకు, డిస్ట్రిబ్యూటర్లకు, టోటల్‌గా పరిశ్రమకు నష్టాలు వాటిల్లే ప్రమాదం ఉందని అంటున్నారు.

వడ్డీలు పెరిగిపోతున్నాయని ఆందోళన

సినిమా పరిశ్రమలో దాదాపుగా సినిమాలన్నీ ఫైన్సాన్స్ వ్యవస్థపై ఆధార పడి తెరకెక్కుతుంటాయి. విడుదల ఆలస్యం అయిన కొద్దీ అప్పులకు వడ్డీలు పెరిగిపోతాయని ఆందోళన చెందుతున్నారు పలువురు నిర్మాతలు.

అందరు హీరోలపై ప్రభావం

పవన్ కళ్యాణ్, రామ్ చరణ్ తేజ్ నటించిన రెండు పెద్ద సినిమాల విడుదల ఆగి పోవడం వల్ల ఈ సంవత్సరం విడుదలయ్యే మహేష్ బాబు, జూ ఎన్టీఆర్, వెంకటేష్, రామ్ సినిమాలపై ప్రభావం పడుతుందని, వాటి విడుదల కూడా ఆలస్యం అయ్యే అవకాశాలు ఉంటాయని అంటున్నారు డిస్ట్రిబ్యూటర్లు.

దాదాపు 250 కోట్ల వ్యాపారం అయోమయంలో

ఎవడు, అత్తారింటికి దారేది చిత్రాలతో పాటు ఈ సంవత్సరాంతం వరకు విడుదల సిద్ధమైన మరికొన్ని పెద్ద సినిమాలన్నీ కలిసి 250 కోట్ల పైచిలుకు విలువ చేస్తాయని అంచనా. సమైక్య ఉద్యమం పరిణామాలు వందల కోట్ల తెలుగు సినీ పరిశ్రమ వ్యాపారాన్ని అయోమయంలో నెట్టాయని చెప్పక తప్పదు.

అప్పట్లో తెలంగాణ ఉద్యమం కూడా...

అప్పట్లో తెలంగాణ ఉద్యమం సందర్బంగా కొందరు ఆందోళన కారులు సినిమాలను అడ్డుకున్నారు. దీంతో పలు సినిమాలు చాలా నష్టపోయాయి. కొన్ని సినిమాల పరిస్థితి అయితే అప్పట్లో మరీ దారుణంగా తయారైంది.