విద్యపై ఆలోచనాత్మక షార్ట్ ఫిల్మ్ ‘ఎంతెంత దూరం’

హైదరాబాద్ : చదువు ఉన్నోళ్ల సొత్తుకాదు. చదువు ఏ ఒక్కరో సొంతం చేసుకున్న ఆస్తి కాదు. చదువు పల్లె పట్టణాల తేడా చూడదు. చదువు దొరల గడీలో బందీకాదు. చదువు అందరిది. పట్టుదల ఉంటే ఆ చదువు ఎంతెంతో దూరంలో లేదు అంటూ చూపించాడు దర్శక నిర్మాత నక్షత్రం వేణుగోపాల్. 'ఎంతెంత దూరం' పేరుతో విద్యపై వేణు తీసిన షార్ట్ ఫిలిం అందరి మన్ననలూ అందుకుంటుంది. ఇప్పటికే ఇఫ్లూ మరియు న్యూ జెర్సీ USA లో ప్రదర్శించ బడి పలువురి ప్రశంశలు అందుకొని, ఇప్పుడు వర్జీనియాలో ప్రదర్శనకు సిద్దమయింది.

చదువు కొందరికి మాత్రమే సొంతమయ్య రోజులు పోయాయి‌. అందరూ చదువుకుని ప్రయోజకులయ్యే రోజులు వస్తున్నాయి. చదువు విలువ అందరూ తెలుసుకునే రోజులు అతి దగ్గరలో ఉన్నాయనే అంశంపై 'ఎంతెంత దూరం' పేరుతో లఘు చిత్రం తీశారు ఎన్నారై నక్షత్రం వేణుగోపాల్. నక్షత్ర ప్రొడక్షన్స్ సంస్థ తీసిన ఈ షార్ట్‌ ఫిలిం మేధావుల దృష్టిని ఆకర్షించడమే కాదు.. అందరినీ ఆలోచింపచేస్తోంది.

ముత్తయ్య పాత్రలో మాభూమి, దాసి వంటి చిత్రాలతో కళాత్మక చిత్రాల నుటుడిగా పేరు తెచ్చుకున్న భూపాల్ రెడ్డి నటించి జీవించారు. ముత్తయ్య భార్య పాత్రలో టీవీ, సినిమా ఆర్టిస్టు మధుమణి, దొర పాత్రలో హరి, ధనుంజయ పాత్రలో అంజిబాబు అద్భుతంగా నటించారు.

షార్ట్ ఫిలిం ప్రతి ఫ్రేమ్‌ లోనూ దర్శకుడు వేణు నక్షత్రం ప్రతిభ కనపడుతుంది. అమెరికాలో సాఫ్ట్‌వేర్‌ ఇంజినీర్‌ గా పనిచేస్తున్న వేణు తీసిన ఎంతెంత దూరం లఘు చిత్రం ఇటీవల హైదరాబాద్ ఇఫ్లూ యూనివర్సిటీలో ప్రదర్శించారు. ఈ చిత్రానికి పలువురు ప్రముఖుల ప్రశంసలు లభించాయి. గతంలో వేణు తీసిన 'టేబుల్ ఫర్ త్రీ' లఘు చిత్రం కేన్స్ ఫిలిం ఫెస్టివల్ లో సెలెక్ట్ కావడమే కాకుండా, వాషింగ్టన్ మ్యూజిక్ ఫిలిం ఫెస్టివల్ లో ఎనిమిది అవార్డులు అభించాయి. ఈ చిత్రాన్ని కూడా పలు అవార్డుల కోసం పంపించనున్నట్లు వేణు తెలిపారు.