ముగిసిన సినీ వివాదం

By Staff

Published: Saturday, December 20, 2008, 9:58 [IST]

ఎట్టకేలకు తెలుగు సినిమా నిర్మాతలు, ప్రదర్శనదారుల మధ్య నెలకొన్న వివాదం ఓ కొలిక్కి వచ్చింది. ఎనిమిది రోజుల రిలే నిరాహారదీక్షల అనంతరం ఇరు పక్షాలు ఒక ఒప్పందానికొచ్చాయి. సినిమాల ప్రదర్శనకు పర్సెంటేజీ విధానాన్ని ప్రదర్శనదారులు ఒప్పుకున్నారని చిన్న నిర్మాతలు తెలిపారు. ఈ విషయాన్ని శుక్రవారం రాత్రి విలేఖరుల సమావేశంలో వెల్లడించారు. నిర్మాతల మండలి అధ్యక్షుడు తమ్మారెడ్డి భరద్వాజ మాట్లాడుతూ ''నిర్మాతల్లో చిన్నా పెద్దా తేడా లేదు. ఐక్యతగా పోరాడి విజయం సాధించినందుకు శుభాకాంక్షలు'' అని చెప్పారు.

''పర్సెంటేజీ విధానంతో సినిమాలు ప్రదర్శిస్తామన్నందుకు కృతజ్ఞతలు. హౌస్‌ఫుల్‌ కలెక్షన్లు ఉన్నప్పుడు 75 శాతం నిర్మాతలకు, 25 శాతం వాటా ప్రదర్శనదారులకు దక్కుతుంది. వసూళ్లు తగ్గే కొద్దీ ఈ శాతాల్లో మార్పులుంటాయి. మా కృషి ఫలించినందుకు ఆనందంగా ఉంది. సినిమా వాళ్లమంతా సోదరులం. ఎవరినైనా కించపరిచి ఉంటే అది కేవలం బాధతోనే కానీ.. వేరే ఉద్దేశంతో కాదు. చిన్న సినిమాను ఆస్కార్‌ స్థాయికి తీసుకెళ్లి మా సత్తాను నిరూపించుకుంటామ''ని నిర్మాతలు పేర్కొన్నారు. ఈసమావేశంలో నిర్మాతలు సంగిశెట్టి దశరథ, చదలవాడ శ్రీనివాసరావు, జీవిత, టీవీడీ ప్రసాద్‌, ఆర్‌.కె, నట్టికుమార్‌, వడ్డాది రమేష్‌, గంటా శీను తదితరులు పాల్గొన్నారు.

More from Filmibeat