కాపీ కొట్టడం కూడా రాదా?

బాలీవుడ్ హిట్ మైహూనా ని శ్రీహరి హీరోగా పెట్టి శ్రీశైలం అనే పేరుతో ఫ్రీమేక్ చేసిన దర్శకుడు కె.ఎస్.నాగేశ్వరరావు సర్వత్రా విమర్శలు ఎదుర్కొంటున్నాడు. అందులో షారూఖ్ చేసిన పాత్రలో శ్రీహరి బాగానే కనిపించాడు గానీ కథా బలం సరిగ్గా కుదరకపోవటంతో కుదేలైందని చెప్తున్నారు. దాంతో ప్రేక్షకులకు తెరపై ఒక్క శ్రీశైలం దర్శనం మాత్రమే కాక అందరు దేవుళ్ళూ కట్టకట్టుకుని కనపడుతున్నారని అంటున్నారు. అలాగే జియాద్ ఖాన్ పాత్రలో రామ్ కిరణ్ అనే నటుడు కనిపించాడని,అతని స్టేచర్ మామూలు నటుడుగా కూడా పనికిరాదని వినిపిస్తోంది. ఇక అమృతారావు పాత్రలో సుహాని(సవాల్ ఫేం)అర్ధంపర్ధం లేకుండా నటించిపారేశిందని అంటున్నారు.

ఇక ఈ విమర్శలు ప్రక్కన పెడితే నాగేశ్వరరావు ఒకే ఒక తెలివైన నిర్ణయం ఈ సినిమాకు తీసుకున్నాడని తెలుస్తోంది. అది మరేదో కాదు...మైహూనా మాదిరిగా శ్రీహరిని స్టూడెంట్ గా ప్రవేశపెట్టలేదని...అతను పుస్తకాలు పట్టుకుని కాలేజీకి వెళ్తే చూడలేమని అంటున్నారు. అయితే కాలేజీలోకి శ్రీహరి ఎలా ప్రవేశిస్తాడూ అంటే బస్ డ్రైవర్ గా అని తెలుస్తోంది. ఇక విలన్ గా అందులో సునీల్ షెట్టి చేసిన పాత్రను యస్పాల్ శర్మ పోషించారు.రెబల్ స్టార్ కృష్ణం రాజు మరో పాత్రలో కనిపించి ఇలా నటించాడేంటి అనిపించాడని అంటున్నారు. గతంలో శ్రీహరి కి పోలీస్,దేవా,సాంబయ్య వంటి హిట్స్ ఇచ్చిన ఈ డైరక్టర్ ఇలాంటి సినిమాతో వస్తారని ఊహించలేమంటున్నారు. అయితే శ్రీహరి మాత్రం ఇది బి,సి సెంటర్లను టార్గెట్ చేసిన సినిమా ఇట్లానే ఉంటుందని అభయమిస్తున్నాడు.