రాణా ట్వీట్: రాజమౌళిలోని రాక్షస కోణం!

హైదరాబాద్ : సినిమాకు కెప్టెన్‌గా ఉండే దర్శకుడు పని రాక్షసుడు అయితే...ఇక ఆర్టిస్టుల అవస్థలు వర్ణనాతీతం. తాజాగా 'బాహుబలి' సినిమా షూటింగ్ విషయంలో దర్శకుడు రాజమౌళి పని రాక్షసుడిగా మారాడని ఆ చిత్రంలో నటిస్తున్న రాణా చేసిన వ్యాఖ్యలను బట్టి స్పష్టం అవుతోంది. అఫ్‌కోర్స్ ఇదంతా....అందరి మంచి కోసం, సినిమా త్వరగా పూర్తి కావాలనే అనుకోండి!

సినిమా విషయంలో ఎంత చిత్తశుద్ధిగా ఉంటే మాత్రం 24 గంటలూ ఎడతెరిపి లేకుండా పని చేయించడం అంటే నరకంలానే ఉంటుంది. కానీ రాజమౌళి ఇవన్నీ ఆలోచించకుండా రాజమౌళి తనూ కష్టపడుతూ ఆర్టిస్టులతో కూడా కష్టపడి 24 గంటలు పని చేయిస్తున్నాడట. ఈ చిత్రంలో ముఖ్య పాత్రలో నటించిన రాణా వ్యాఖ్యలను నిశితంగా పరిశీలిస్తే ఈ విషయం అర్థం అవుతుంది.

'బాహుబలి సెకండ్ షెడ్యూల్‌లో నా పని పూర్తయింది. ఈ షెడ్యూల్ మొత్తం ఓమారథాన్‌లా సాగింది. ఉదయం 7 గంటలకు రాత్రి 10 గంటలకు వరకు షూటింగ్. అర్థరాత్రి వరకు కూడా ట్రైనింగ్ జరిగింది' అంటూ ట్వీట్ చేసాడు. 'ఒక వారాంతం అయితే ఆదివారం ఉదయం 7 గంటల నుంచి నాన్ స్టాప్‌గా సోమవారం ఉదయం 8 గంటల వరకు 24 గంటలు పని సాగింది' అని రాణా పేర్కొన్నారు.

ఈ బిజీ షెడ్యూల్ వల్లనే ఈ మధ్య రాణా ట్విట్టర్లో యాక్టివ్‌గా లేక పోయాడట. రాజమౌళి దర్శకత్వం వహిస్తున్న ఈ చిత్రంలో ప్రభాస్, అనుష్క, రమ్య కృష్ణ, సత్యరాజ్, నాజర్, అడవి శేషు, సుదీప్ తదితరులు ముఖ్య పాత్రలు పోషిస్తున్నారు. ఆర్కా మీడియా బేనర్‌పై శోభు యార్లగడ్డ, కె. రాఘవేంద్రరావు, దేవినేని ప్రసాద్ సంయుక్తంగా నిర్మిస్తున్నారు. తెలుగు, తమిళంలో షూట్ చేస్తున్నారు. హిందీ, విదేశీ బాషల్లోనూ విడుదల చేసే అవకాశం ఉంది.