తొలిసారి మీడియా ముందుకు అలీ: పులిబిడ్డపై ప్రశంసలు.. పవన్ కళ్యాణ్ గురించి?

తొలిసారి మీడియా ముందుకు అలీ

ఎన్నికల ఫలితాల తర్వాత మీడియాకు ఎదురు పడకుండా జాగ్రత్త పడ్డ అలీ... ఎట్టకేలకు ఏపీ సీఎంగా వైఎస్ జగన్మోహన్ రెడ్డి ప్రమాణ స్వీకారం నేపథ్యంలో విజయవాడలో ప్రత్యక్షం అయ్యారు. జగన్ ముఖ్యమంత్రిగా పదవి చేపట్టబోతుండటంపై ఆనందం వ్యక్తం చేశారు.

పులివెందుల ముద్దు బిడ్డ, పులి బిడ్డ అంటూ..

పులివెందుల ముద్దు బిడ్డ, పులి బిడ్డ వైఎస్ జగన్మోహన్ రెడ్డిగారి ఆశయం ఇప్పటికి నెరవేరింది. గత పదేళ్ల నుంచి ఆంధ్రప్రదేశ్ అభివృద్ధి కోసం ఆయన ఎదురు చూశారు. ఆ రోజు ఇప్పుడు వచ్చింది. ఈ సందర్భంగా మన కొత్త సీఎంకు స్వాగతం పలుకుతున్నట్లు అలీ తెలిపారు.

నవరత్నాలు ఆల్ ది బెస్ట్

తాము కోరుకున్న నాయకుడు ముఖ్యమంత్రి అవుతుంటే చూసేందుకు ఎన్నో జిల్లాల నుంచి ప్రజలు ఇక్కడకు రావడం జరిగింది. ఇంటికి నవ ధాన్యాలు ఎంత అవసరమో ఈ ఆంధ్రప్రదేశ్ రాష్ట్రానికి, కొత్త రాజధానికి ఈ నవరత్నాలు అంతే అవసరం. మొదటి సంతకం నవరత్నాల మీద పెడుతున్న ఆయనకు ఆల్ ది బెస్ట్ తెలిపారు.

పవన్ కళ్యాణ్ ప్రస్తావన వస్తుందనే

ఈ ఎన్నికల్లో పవన్ కళ్యాణ్ ఓటమిపై అలీ ఎలా స్పందిస్తారనే విషయం తెలుసుకునేందుకు మీడియా వారు ఆసక్తిగా ఎదురు చూస్తున్నారు. ఇది ముందే గమనించిన అలీ వీలైనంత దూరంగా ఉంటూ వచ్చారు. ఆ అంశంపై మాట్లాడటం ఆయనకు ఇష్టం లేదని తెలుస్తోంది.