సినీ ప్రేమికులకు...బ్యాడ్ న్యూస్

By Staff

Published: Friday, December 19, 2008, 11:18 [IST]

పెద్ద నిర్మాతలను సేవ్ చేయటానికి రాష్ట్ర ప్రభుత్వం కంకణం కట్టుకుంది. దాంతో రాష్ట్రంలో మళ్లీ సినిమా టికెట్ల ధరలు పెరిగాయి.అయితే ధరల పెరుగుదల నుంచి కింది తరగతుల ప్రేక్షకులను మినహాయించారు. గతంలో పెద్ద సినిమాలు విడుదలైన రెండువారాల వరకు ధరలను పెంచుకునే అవకాశం ఉండేది. రెండు నెలల క్రితం ఈ ఉత్తర్వులను ప్రభుత్వం రద్దు చేసింది. ఈ క్రమంలో విడుదలైన చింతకాయల రవి, శౌర్యం లాంటి పలు పెద్ద సినిమాల నిర్మాతలు నష్టపోయారు. ప్రొడక్షన్‌లో ఉన్న పలు పెద్ద సినిమాల నిర్మాతలు ఖంగుతిన్నారు. దీంతో, ఏపీ ఫిల్మ్‌ చాంబర్‌ ఆఫ్‌ కామర్స్‌, హైదరాబాద్‌ స్టేట్‌ ఫిల్మ్‌ చాంబర్‌ ఆఫ్‌ కామర్స్‌ నాయకులు టికెట్ల ధరలు పెంచాలని విజ్ఞప్తి చేశారు.

ఇటీవల జరిగిన నంది అవార్డుల సభలో టికెట్ల ధరను రూ.50కు పెంచుతున్నట్టు ముఖ్యమంత్రి ప్రకటించిన నేపధ్యంలో గురువారం జారీ అయిన ఉత్తర్వులపై సినీ నిర్మాతలు భిన్నాభిప్రాయాలు వ్యక్తం చేస్తున్నారు. అయితే ఆర్‌ .నారాయణమూర్తి లాంటి చిన్నచిత్రాల నిర్మాతలు మాత్రం టికెట్ల ధరల పెంపును తొలి నుంచి వ్యతిరేకిస్తున్నారు. టికెట్ల ధరలను పెంచడం వలన తాము తీవ్రంగా నష్టపోతున్నట్టు చిన్న నిర్మాతలు ఆందోళన వ్యక్తం చే సినప్పటికీప్రభుత్వం పట్టించుకోకపోవడంపై విమర్శలు వస్తున్నాయి. ప్రస్తుతం ఎయిర్‌ కండీషన్డ్‌ థియేటర్‌లో అప్పర్‌ క్లాస్‌ టికెట్‌ ధర రూ.40 ఉంది, ఎయిర్‌ కూల్డ్‌ థియేటర్లలో ఈ ధర రూ.35 మాత్రమే. తాజా మార్పుల అనంతరం రెండు రకాల ఏసీ థియేటర్లలో ఇకపై అప్పర్‌ క్లాస్‌ టికెట్‌ ధర రూ.50 ఉంటుంది.

More from Filmibeat