రివ్యూ రేటింగ్ తక్కువ ఇచ్చారని కాదు, ఆ మాట వల్లే మండింది: తరుణ్ భాస్కర్

ముందు నుండి ఆ భయం ఉంది

ప్రేక్షకుల నుండి మా సినిమాకు మంచి రెస్పాన్స్ వస్తోంది. సినిమా చాలా సక్సెస్ ఫుల్ గా రన్ అవుతోంది. కొత్తవాళ్లతో సినిమా చేసినపుడు ఏదైనా తేడా వస్తుందేమో? ఓపెనింగ్స్ ఉంటాయా? ఉండవా? అనే భయం ఉండేది. కానీ థియేటర్లో రెస్పాన్స్ చూసినపుడు చాలా సంతోషం అనిపించింది. మా కష్టానికి తగిన ప్రతిపలం దక్కింది అనిపించింది. రిపీటెడ్ ఆడియన్స్ వస్తున్నారు. సినిమాలోని ప్రతి క్యారెక్టర్ కు రిలేట్ అవుతున్నారు... అని తరుణ్ భాస్కర్ తెలిపారు.

పెళ్లి చూపులుతో పోల్చొద్దు

కొందరు పెళ్లి చూపులు లాగా ఉందా? అనే సందేహంలో ఉన్నారు. కానీ ఇది పెళ్లి చూపులు కంటే డిఫరెంట్ ఫిల్మ్. దానికి దీనికి ఎక్కడా కంపారిజన్ లేదు. సినిమాలో ఎక్కడా వల్గారిటీ లేదు. ఆల్కహాల్ గురించి కొన్ని సీన్లు ఉన్నా కానీ ఈ జనరేషన్ గురించి చెప్పే సీన్లు అవి. సినిమా చూసిన తర్వాత ఈ తరం మనుషుల గురించి మీరు ఆలోచిస్తారు. అదే విధంగా మీ పాత జ్ఞాపకాలు మీకు గుర్తుకు వస్తాయని నమ్ముతున్నాను... అన్ని తరుణ్ వ్యాఖ్యానించారు.

రివ్యూలను గౌరవిస్తాను

రివ్యూల గురించి నేను చేసిన కామెంట్లపై బయట విమర్శలు వస్తున్నాయి. కానీ రివ్యూలను ఎప్పుడూ గౌరవిస్తాను. ఆ రివ్యూల నుండే ‘పెళ్లి చూపులు' మూవీకి సక్సెస్ వచ్చింది. ‘ఈ నగరానికి ఏమైంది?' చిత్రానికి కూడా చాలా మంచి రివ్యూలు వచ్చాయి. కొందరు 2 స్టార్ రేటింగ్ ఇచ్చినా పెద్దగా బాధపడేలేదు. నేను అందరి అభిప్రాయాలను గౌరవిస్తాను. రివ్యూలు చూసే నేను ప్రతిసారి నన్ను నేను మరింత బెటర్ గా మార్చుకుంటాను.

ఆ కామెంట్ చేయడం వల్లే మండింది

మొన్న సోషల్ మీడియాలో రివ్యూలను ఉద్దేశించి ఆ కామెంట్ చేయడానికి కారణం.... కొందరు తమ రివ్యూల్లో కెమెరా ఇక్కడ పెట్టాలి, లైటింగ్ అక్కడ పెట్టాలి అని రాసినపుడు మా అందరికీ మండిపోయి అలాంటి పోస్ట్ పెట్టాల్సి వచ్చింది. సోషల్ మీడియాలో ఏ చిన్న మాట మాట్లాడినా అది పెద్దగా అవుతుంది. నాకు మీ అందరి సపోర్ట్ అవసరం, మీ రివ్యూలు చాలా ముఖ్యం. ప్రతి ఒక్క రివ్యూను గౌరవిస్తాను. అందులో ఎలాంటి సందేహం లేదు... అని తరుణ్ భాస్కర్ తెలిపారు.