చిరు ఇంట్లో జరిగినట్టే.. మణిశర్మ స్టూడియోలోనూ ఊహించని సంఘటన..

అసలేం జరిగింది:

సినిమా పనుల నిమిత్తం జనవరి 27న చెన్నై వెళ్లారు మణిశర్మ. తిరిగి ఈ నెల 2న హైదరాబాద్ వచ్చారు. స్టూడియోకి వెళ్లి శనివారం తన బీరువాను ఓపెన్ చేసి చూడగా అందులో నగదు మాయమవడం ఆశ్చర్యానికి గురిచేసింది.

పోలీసులకు ఫిర్యాదు:

నగదు మాయమవడంతో వెంటనే మేనేజర్ సుబ్బానాయుడుకి విషయం చెప్పారు మణిశర్మ. ఆపై బంజారాహిల్స్‌ పోలీసులకు ఈ చోరీ ఘటనపై ఫిర్యాదు చేశారు. డీఐ కె.రవికుమార్‌ కేసు నమోదు చేసుకొని దర్యాప్తు చేపట్టారు.

మణిశర్మ ఏమన్నారు:

ఆదివారం రోజు అవసరాల నిమిత్తం కొంత నగదు తీసేందుకు బీరువా ఓపెన్ చేసినట్లు మణిశర్మ చెప్పారు. అయితే అందులో దాచిన రూ.4లక్షల డబ్బు కనిపించకపోవడం ఆశ్చర్యానికి గురిచేసిందన్నారు. మేనేజర్ తో చెప్పించి పోలీసులకు ఫిర్యాదు చేసినట్లు పేర్కొన్నారు.

పీఏ పైనే అనుమానం:

మణిశర్మ వ్యక్తిగత సహాయకుడు వెంకటేష్ పైనే మణిశర్మ తరుపువారు అనుమానం వ్యక్తం చేస్తున్నట్లు తెలుస్తోంది. వెంకటేషే దొంగతనానికి పాల్పడి ఉంటాడని మణిశర్మ మేనేజర్ సుబ్బానాయుడు తన ఫిర్యాదులోనూ పేర్కొన్నారు. దీంతో పోలీసులు అతన్ని అదుపులోకి తీసుకుని విచారిస్తున్నారు.

చిరు ఇంట్లోనూ..:

మొన్నీమధ్యే మెగాస్టార్ చిరంజీవి ఇంట్లో కూడా రూ.2లక్షల నగదు చోరీకి గురైన సంగతి తెలిసిందే. పోలీసులకు ఫిర్యాదు చేయడంతో.. ఇంట్లో పనిచేసే వ్యక్తే ఆ చోరీకి పాల్పడ్డాడని తేలింది. ఆపై అతన్ని పట్టుకుని డబ్బును తిరిగి స్వాధీనం చేసుకున్నారు.