దేవుడు లేడు... కులం ఇష్యూపై మెగా బ్రదర్ నాగబాబు ఇంట్రెస్టింగ్ కామెంట్

అప్పుడు భయంకరమైన ఆస్తికుడిని, కానీ..

‘‘మతం, కులం గురించి చెప్పేముందు నాలో వచ్చిన ఓ మార్పు గురించి చెప్పాలి. నేను 2 సంవత్సరాల క్రితం వరకు భయంకరమైన ఆస్తికున్ని.. చాలా పూజలు చేసేవాడిని, జాతకాలు నమ్మేవాడిని, యజ్ఞాలు, హోమాలు చేసేవాడిని. మా నాన్న ఆంజనేయ స్వామికి పెద్ద భక్తుడు, మా ఇంట్లో అందరూ అలాగే ఉంటారు. సంవత్సరం క్రితం వరకు కూడా భక్తితో ఉండేవాడిని.'' అని నాగబాబు చెప్పుకొచ్చారు.

రియలైజ్ అయ్యాను, దేవుడు లేడు

‘కానీ ఒక రోజు నేను రియలైజ్ అయ్యాను. దేవుడు లేడు. దేవుడు లేనపుడు మతం అనే ప్రశ్నే ఉండదు. మతం లేనపుడు కులం కూడా ఉండదు. నా ఆలోచన స్థాయి ప్రకారం.. మతం అనేది అన్నింటికంటే పెద్ద ఇష్యూ. మతాల వల్లే కులాలు పుట్టాయి. మతం లేనపుడు కులం లేదు. కానీ మతం వద్దు, కులం వద్దు అని చెప్పే పరిస్థితి లేదు.

కులరహితంగా ఉండే సమాజం గొప్ప సమాజం

నా ఉద్దేశ్యంలో కులరహితంగా ఉండే సమాజం గొప్ప సమాజం. అయితే మతాలు, కులాలు సమాజంలో సెట్టయిపోయాయి కాబట్టి మనం ఎవరినీ తక్కువ చేసి చూడాల్సిన అవసరం లేదు. కానీ వాటి తాలూకు ప్రభావం ప్రజల్లో చాలా ఎక్కువగా ఉంది.

కళ్యాణ్ బాబు అదే చేస్తున్నాడు

ప్రజల్లో కులం, మతం ప్రభావం తొలగించి.. మనం అందరం భారతీయులం అనే భావన తీసుకురావాలి. కళ్యాణ్ బాబు అదే చేస్తున్నారు. కులాలన్నింటినీ కలిపి మత ప్రభావం లేని భావజాలాన్ని ప్రజల్లోకి తీసుకొస్తున్నాడు. అది చాలా స్లోగా వర్కౌట్ అవుతుంది. మొన్న ఎన్నికల్లో కూడా అదే వర్కౌట్ అయింది.

అగ్రకులం వాళ్లు మేమే గొప్ప అని

కులాలు సౌకర్యం కోసం పెట్టుకున్నవే తప్ప... ఒక మనిషిని కులం కారణంగా తక్కువగా చూడటం అనేది ఉండకూడదు. కానీ అలాగే జరుగుతోంది. ఇతడు తక్కువ కులం వాడు, అతడు అగ్రకులం వాడు ఆనే ఆలోచనే మన సమాజంలో ఉన్న అనారోగ్యకరమైన ఆలోచన. అగ్రకులం వాళ్లు మేమే గొప్ప అని భావించడంతో పాటు తక్కువ కులం వారిలో ఒక ఆత్మన్యూన్యత భావం క్రియేట్ చేశారు.

ఇప్పుడిప్పుడే ఆ ఫీలింగ్ నుంచి బయటపడున్నారు

క్రింది వర్గాల్లో ఉన్న వారు ఇప్పుడిప్పుడే ఆ ఫీలింగ్ నుంచి బయటపడి మేము కూడా అందరితో సమానం అనే ఆలోచన చేస్తున్నారు. పోరాటం చేస్తున్నారు. ఆ ఆలోచనకు ఆజ్యం పోసింది అంబేద్కర్. గాంధీ గారు స్వతంత్ర్యం కోసం ఎంత గొప్పగా పోరాటం చేశారో జనాల్లో ఉండే అసమానతల గురించడానికి అంబేద్కర్ అంతే గొప్పగా ప్రణాళికలు తయారు చేశారని నాగబాబు తెలిపారు.