ఆ వ్యాపారవేత్త నన్ను లైంగికంగా వేధిస్తున్నాడు: ఒకప్పటి బాలీవుడ్ తార..

ఎవరా వ్యాపారవేత్త?:

అమర్ ఖన్నా అనే వ్యాపారవేత్త గత కొంతకాలంగా తనను లైంగికంగా వేధిస్తున్నాడని జీనత్ అమన్ తన ఫిర్యాదులో పేర్కొన్నారు. తనతో చాలా అసభ్యంగా ప్రవర్తిస్తున్నాడని తెలిపారు.

పరారీలో నిందితుడు:

జీనత్ అమన్ ఫిర్యాదు మేరకు సెక్షన్స్-304D, 509ల కింద ముంబై జుహు పోలీసులు కేసు నమోదు చేశారు. ప్రస్తుతం అమర్ ఖన్నా పరారీలో ఉన్నట్లు గుర్తించారు.

పోలీసుల వివరణ:

జీనత్ అమన్ ఫిర్యాదుపై ప్రాథమిక విచారణ చేపట్టిన పోలీసులు పలు ఆసక్తికర విషయాలు వెల్లడించారు. అమర్ ఖన్నాతో జీనత్ అమన్ కు చాలాకాలంగా పరిచయం ఉందని, కొన్ని విభేదాల కారణంగా ఇద్దరి మధ్య సత్సంబంధాలు చెడిపోయానని తెలిపారు. అప్పటినుంచి జీనత్ అమన్ అమర్ ఖన్నాతో మాట్లాడటం మానేసిందన్నారు.

పద్దతి మారకపోవడంతోనే:

జీనత్ అమన్ తనతో మాట్లాడకపోతుండటంతో.. అమర్ ఖన్నా ఆమెను చాలారోజుల నుంచి ఫాలో అవుతున్నారని, పదేపదే ఫోన్ కాల్స్ చేస్తున్నాడని పోలీసులు పేర్కొన్నారు. ఎన్నిసార్లు చెప్పినా అతని తీరులో మార్పు రాకపోవడంతోనే ఆమె తమను ఆశ్రయించిందని చెప్పారు.

ఒకప్పుడు ఓ వెలుగు వెలిగి..:

డెబ్బై, ఎనభై దశకంలో జీనత్ అమన్ ఓ వెలుగు వెలిగింది. అప్పట్లో మిస్ ఆసియా/పసిఫిక్ టైటిల్ కూడా దక్కించుకుంది. హరే రామ హరే కృష్ణ, సత్యం శివం సుందరం, హీరా పెన్నా, యాదోంకి బరాత్, డాన్ వంటి చిత్రాలు ఆమెకు మంచి గుర్తింపును తీసుకొచ్చాయి. జీనత్ అమర్ భర్త మజర్ ఖాన్ 1998లో అనారోగ్య సమస్యలతో కన్నుమూశారు.