హోమ్

న్యూస్

రాష్ట్రంలో డర్టీ పిక్చర్ విడుదలకు లైన్ క్లియర్ అయ్యింది. విద్యాబాలన్ కథానాయికగా ఏక్తా కపూర్ నిర్మించిన 'డర్టీ పిక్చర్' చిత్రంపై దాఖలైన పిటిషన్ ను రాష్ట్ర హైకోర్టు ఈ రోజు కొట్టివేసింది. దీంతో చిత్రం విడుదలపై వున్న సందిగ్దం విడిపోయింది. తన సోదరి సిల్క్ స్మిత జీవితాన్ని వక్రీకరించి ఈ చిత్రాన్ని నిర్మించారనీ, తమ అనుమతి తీసుకోకుండానే చిత్ర నిర్మాణాన్ని జరిపారనీ స్మిత సోదరుడు నాగవరప్రసాద్ హైకోర్టులో కేసు వేసిన సంగతి తెలిసిందే. చిత్రం విడుదల కాకుండా నిలిపి వేయించాల్సిందిగా ఆయన చేసిన విజ్ఞప్తిని కోర్టు తోసిపుచ్చింది.

ఈ సినిమాకు సంబంధించిన తెలుగు హక్కులను ఇంద్రా ఫిలింస్ దక్కించుకుంది. విద్యాబాలన్ ఈ చిత్రంలో హీరోయిన్ గా నటించింది. నసీరుద్దిన్ షా మరియు ఇమ్రాన్ హష్మి ఇతర ముఖ్య పాత్రలు పోషిస్తున్నారు. ఈ చిత్రాన్ని రేపు (డిసెంబర్ 2) ప్రపంచవ్యాప్తంగా విడుదల చేస్తున్నారు. ఇప్పటికే ఈ చిత్రంలో విద్యా బాలన్ నటించిన సన్నివేశాలు పాటలు మీడియాకు విడుదల చేయగా భారీ స్పందన లభిస్తోంది. డిసెంబరు 2న ప్రపంచవ్యాప్తంగా విడుదల చేస్తున్న ఈ చిత్రం హిందీ, తెలుగుతో పాటు పలు భాషల్లో విడులవుతోంది.

అయితే 'ది డర్టీ పిక్చర్" చిత్రంపై పాకిస్తాన్ నిషేధం విధించింది. చిత్ర నిర్మాతలు డిసెంబరు 2న పాకిస్తాన్లో విడుదల చేయడానికి సన్నాహాలు చేసారు. ఆ దేశ సెన్సార్ సభ్యులతో కూడిన బృందం విడుదలకి నిరాకరించింది. చిత్ర నిర్మాతలు కూడా ఈ విషయాన్నీ ధ్రువీకరించారు.