పవన్ కళ్యాణ్ అనుకున్నాం కానీ! ఎన్టీఆర్ కోసం చేస్తా.. సీక్రెట్స్ బయటపెట్టిన విజయ్ సేతుపతి డైరెక్టర్

విజయ్ సేతుపతితో విజయ్ చందర్

మక్కల్ సెల్వన్ విజయ్ సేతుపతి హీరోగా తమిళంలో తెరకెక్కిన చిత్రం ‘సంగతమిళన్'. ఈ సినిమాను తెలుగులో ‘విజయ్ సేతుపతి' అనే టైటిల్‌తో విడుదల చేస్తున్నారు. చిత్రంలో విజయ్ సేతుపతి సరసన రాశీఖన్నా హీరోయిన్ గా నటిస్తుండగా, నివేద పేతురాజ్ కీలక పాత్ర పోషిస్తోంది. విజయ్ చందర్ దర్శకత్వం వహిస్తున్నారు. నవంబర్ 15వ తేదీన రెండు భాషల్లో ఒకేసారి ఈ సినిమా విడుదలవుతోంది.

ప్రమోషన్స్‌లో భాగంగా డైరెక్టర్

విజయ్ సేతుపతి సినిమా ప్రమోషన్స్‌లో భాగంగా డైరెక్టర్ విజయ్ చందర్ ఈ సినిమాకు సంబంధించిన కొన్ని సీక్రెట్స్ బయటపెట్టేశాడు. ముందుగా పవన్ కళ్యాణ్‌ని దృష్టిలో పెట్టుకొని ఈ సినిమా కథను రాసుకున్నానని, అయితే ఆయన రాజకీయాలతో బిజీ కావడం కారణంగా విజయ్ సేతుపతిని తీసుకున్నామని చెప్పారు.

ఇక్కడ పవన్.. అక్కడ విజయ్ సేతుపతి అందుకే..

తెలుగులో పవన్ కళ్యాణ్‌కి ఎంత పాపులారిటీ, ఇమేజ్ ఉందో.. తమిళంలో విజయ్ సేతుపతికి కూడా అంతే ఫాలోయింగ్ ఉందని, అందుకే ఈ కథను ఆయనతో చేశామని చెప్పారు డైరెక్టర్ విజయ్ చందర్. ఈ కథ విన్న విజయ్ సేతుపతి వెంటనే ఓకే చెప్పారని ఆయన తెలిపారు.

ప్రజా సమస్య గురించి పోరాడే వ్యక్తి

ఈ సినిమాలో విజయ్ సేతుపతి ఒక ప్రజా సమస్య గురించి పోరాడే వ్యక్తిగా నటిస్తారని డైరెక్టర్ విజయ్ చందర్ అన్నారు. విజయ్ సేతుపతి ద్విపాత్రాభినయం చేశారని ఈ సందర్బంగా ఆయన వెల్లడించారు. తెలుగు, తమిళ భాషల్లో పక్కాగా ఈ సినిమా సూపర్ హిట్ సాధిస్తుందని నమ్మకంగా ఉన్నట్లు ఆయన చెప్పారు.

జూనియర్ ఎన్టీఆర్ లాంటి హీరోలతో..

తమిళంలో కంటే తెలుగులోనే కమర్షియల్ సినిమాలను ప్రేక్షకులు బాగా ఆదరిస్తారని, అందుకే ఇక్కడ సినిమాలు చేయాలనుకుంటున్నానని తన మనసులో మాటను బయటపెట్టారు డైరెక్టర్ విజయ్ చందర్. జూనియర్ ఎన్టీఆర్ లాంటి హీరోలతో సినిమాలు చేయడమంటే తనకు చాలా ఇష్టమని, ఆయన కోసం కథ సిద్ధం చేస్తానని ఈ సందర్బంగా ఆయన చెప్పారు.