తెలుగులో విక్రమ్ డైరెక్ట్ ఫిల్మ్

By Staff

Published: Friday, March 13, 2026, 9:19 [IST]

'అపరిచితుడు' లో అంతర్జాతీయస్థాయి నటనని కనపర్చిన విక్రమ్ ఇప్పుడు తెలుగు ప్రేక్షకులను డైరక్టుగా అలరించేందుకు రెడీ అవుతున్నారు. భావోద్వేగాలను తనదైన శైలిలో తెరకెక్కించే బొమ్మరిల్లు భాస్కర్ దర్శకత్వంలో ఈ చిత్రం రూపొందిస్తారు. సంచలనం సృష్టిస్తున్న ఈ వార్త తెలుగు పరిశ్రమలో, అభిమానులలో ఆనందాన్ని కలుగచేస్తోంది. కెరీర్ ప్రారంభంలో విక్రమ్ తెలుగులో తొమ్మిది నెలలు, ఆడాళ్ళా మజాకా, బంగారు కుటుంబం, యూత్ వంటి చిన్నా చితకా సినిమాలు చేసాడు. తమిళంలో సూపర్ స్టార్ అయ్యాక ఇటు వైపు కన్నెత్తి చూడలేదు. తర్వాత అతని సినిమాలు అడపా దడపా డబ్బింగు అవుతూ తెలుగు వారిని ఆకట్టుకుంటూనే ఉన్నాయి. ఇప్పడు విక్రమ్ తమిళంలో శ్రియ హీరోయిన్ గా సుశీ గణేశన్ దర్శకత్వంలో రూపొందుతున్న 'కందసామి'లో నటిస్తున్నారు. దీనిని మల్లన్న'గా తెలుగు వారికి అందించనున్నారు.
కొంతకాలంగా విక్రమ్‌తో తెలుగులో సినిమా నిర్మించడానికి భోగవల్లి ప్రసాద్ ('ఛత్రపతి' ఫేమ్) ప్రయత్నిస్తున్నారు. అది ఒక కొలిక్కి వచ్చిందంటున్నారు. భాస్కర్ ఇప్పటికే విక్రమ్‌కు కథ చెప్పినట్లు, విక్రమ్ సైతం ఆ కథ పట్ల ఆసక్తి చూపినట్లు వారి సన్నిహితులు అంటున్నారు. కాబట్టి త్వరలో ఓ మంచి సినిమా తెలుగు వారిని పలకరించనుందన్నమాట.

More from Filmibeat