బాహుబలి2లో షారుక్ పాత్ర అద్భుతమట! సూర్య, మోహన్‌లాల్ నో..

శాంతిదూతగా షారుక్

బాహుబలి2లో షారుక్ పోషించిన పాత్ర చాలా కీలకమైందట. ప్రభాస్, రానాల నడుమ మధ్యవర్తిత్వం జరిపే ప్రభావవంతమైన పాత్రను ఆయన పోషించినట్టు తెలుస్తున్నది. వారిద్దరి మధ్య ఉన్న వైరుధ్యాన్ని తగ్గించే శాంతిదూతగా అవతారమెత్తినట్టు సమాచారం. ఈ చిత్రంలో ఉన్న అద్భుతమైన సీన్లలో షారుక్ నటించిన సన్నివేశం హైలెట్‌గా నిలుస్తుందనే టాక్ వినిపిస్తున్నది. ఒకవేళ ఈ వార్త నిజమైతే షారుక్ నటించిన చిత్రం మూడు భాషల్లోకి డబ్బింగ్ అవుతుంది.

సామ్రాట్ అశోకుడిగా షారుక్

2001లో విడుదలైన సామ్రాట్ అశోక చిత్రంలో షారుక్ నటించాడు. మౌర్య వంశంలోని గొప్ప సామ్రాజ్యాధినేత అశోకుడి పాత్రను షారుక్ పోషించాడు. ఈ చిత్రం సమ్రాట్ అశోకా పేరుతో పలు భాషల్లో విడుదలైంది. ఈ చిత్రానికి ప్రముఖ ఫొటోగ్రాఫర్ సంతోష్ శివన్ దర్శకత్వం వహించాడు. ఈ చిత్రంలో షారుక్ తోపాటు కరీనా కపూర్, అజిత్, డానీ తదితరులు నటించారు.

విలక్షణ నటులు సూర్య, మోహన్‌లాల్ నో

ఈ చిత్రంలో షారుక్ పోషించినట్టుగా భావిస్తున్న పాత్ర కోసం తొలుత తమిళ సూపర్ స్టార్ సూర్య, మలయాళ అగ్రనటుడు మోహన్‌లాల్‌ను సంప్రదించినట్టు సమాచారం. అయితే ఒకవేళ ఈ వార్త వాస్తవమైతే.. వారు ఈ పాత్రను చేయకపోవడమెనుక కారణమేంటో అంతుపట్టని విషయంగా మారింది.

ఏప్రిల్ 28న విడుదలకు ముస్తాబు

బహుబలి2 షూటింగ్ చాలా రోజులుగా జరుగుతున్నది. జనవరి తొలివారంలో షూటింగ్ కార్యక్రమాలను పూర్తిచేసుకొన్నది. ప్రస్తుతం పోస్ట్ ప్రొడక్షన్ కార్యక్రమంలో బిజీగా ఉన్నది. ఈ చిత్రం ఏప్రిల్ 28న విడుదల చేయనున్నట్టు ఇప్పటికే నిర్మాతలు ప్రకటించారు. ఈ చిత్రానికి సంబంధించి బయటకు వస్తున్న విషయాలు పరిశ్రమలో సంచలనం రేపుతున్నది.

బుసాన్ ఏషియన్ ఫిల్మ్ మార్కెట్‌లో..

అత్యున్నత సాంకేతిక అంశాలతో తెరకెక్కుతున్న బాహుబలి2 చిత్రంపై దేశంలోనే కాకుండా విదేశాల్లోనూ ఆసక్తికరమైన చర్చ జరుగుతున్నది. తాజాగా బుసాన్ ఏషియన్ ఫిల్మ్ మార్కెట్‌లో ఈ ప్రాజెక్ట్ హాట్ టాపిక్‌గా మారింది. బాహుబలి1 సృష్టించిన ప్రభంజనంతో ఈ సినిమాపై ప్రపంచవ్యాప్తంగా ఎగ్జిబిటర్లు, డిస్ట్రిబ్యూటర్లు భారీగా అంచనాలు పెంచుకొంటున్నారు.