రవికుమార్ చౌదరి తో 'ఈతరం'....

By Staff

Published: Wednesday, March 11, 2026, 2:53 [IST]

వీరభధ్ర, ఆటాడిస్తా...చిత్రాలు వర్కవుట్ కాకపోయినా రవికుమార్ చౌదరి కి దర్శకుడిగా అవకాశాలకు లోటు లేదు. ఎందుకంటే 'యజ్ఞం' చిత్రంతో తనేమిటో పూర్తి స్థాయిలో నిరూపించుకున్నాడు. ప్రస్తుతం ఆ నమ్మకంతోనే ఈతరం ఫిలిమ్స్ అధినేత పోకూరి బాబూరావు మరో అవకాశం అతని ముందుంచారు. గోపీచంద్‌తో తీసిన 'ఒంటరి' ఆశించిన రీతిలో ఆడకపోవడంతో ఆయన మంచి సబ్జెక్ట్ కోసం అన్వేషిస్తున్నారు. ఈ సమయంలో రవికుమార్‌ చౌదరి చెప్పిన సబ్జెక్ట్ ఆయనకు నచ్చింది. దాన్ని మరింత డెవలప్ చేసి, సినిమా నిర్మించేందుకు ఆయన సంకల్పించారు. మరోసారి 'యజ్ఞం' మ్యాజిక్‌ను కొనసాగించాలని తపిస్తున్నారు.

అయితే ఈ సినిమాలో హీరో గోపీచంద్ కాదు. 'యజ్ఞం' నుంచి వరుసగా అతనితోటే సినిమాలు తీస్తూ వచ్చిన బాబూరావు ఈసారి తన బానర్‌లో ఇంతదాకా నటించని యువ హీరోతో ఈ సినిమా చేయాలని నిర్ణయించుకున్నారు. ఇప్పటికే ఆ హీరోకు కథ వినిపించారనీ, అతనికి బాగా నచ్చిందనీ తెలుస్తోంది. నిజానికి ఈ తరం ఫిలిమ్స్ ఒకప్పుడు అభ్యుదయ చిత్రాలు,ఆలోచింపచేసే విధంగా తీసేవారు. కానీ తరం మారగానే ఈ తరం కూడా తమ బాటను వీడి 'రణం', 'ఒంటరి' వంటి ఫక్తు మాస్ మసాలా సినిమాలు తీస్తూ ముందుకెళ్తోంది. ఆ కోవలోనే కమర్షియల్ ఎలిమెంట్స్ తో సాగేలా ఈ చిత్రాన్ని రూపొందిస్తారని తెలుస్తోంది.

More from Filmibeat