నేరుగా ఓటీటీలోకి మంచి ఫ్యామిలీ మూవీ.. గుండెలు పిండేసే దీన్ని ఎక్కడ చూడాలంటే!

సాధారణంగా ఈ మధ్య కాలంలో మాస్, క్రైమ్, హర్రర్, లవ్ అండ్ కమర్షియల్ సినిమాలే ఎక్కువగా వస్తున్నాయి. ఇలాంటి వాటికే ప్రేక్షకులు కూడా బాగా అలవాటు పడిపోయారు. ముఖ్యంగా ఓటీటీలో ఈ తరహా కంటెంట్‌నే ఎక్కువగా చూస్తున్నారు. ఈ పరిస్థితుల్లో అప్పుడప్పుడూ కొన్ని ఫ్యామిలీ అండ్ ఎమోషనల్ మూవీస్ కూడా వస్తున్నాయి. అలా రాబోతున్నదే 'డియర్ నాన్న'.

'30 వెడ్స్‌ 21' వెబ్ సిరీస్ ఫేమ్ చైతన్య రావు హీరోగా నటించిన తాజా చిత్రమే 'డియర్ నాన్న'. ఓ మెడికల్ షాప్ నడుపుకునే వ్యక్తి.. తన కొడుకును కూడా ఫార్మసిస్ట్ చేయాలని అనుకుంటాడు. కానీ, హీరో మాత్రం చెఫ్ కావాలని కలలు కంటాడు. ఇలాంటి పరిస్థితుల్లో ఆ కుర్రాడు ఎలాంటి నిర్ణయం తీసుకున్నాడు? ఆ తండ్రి.. కొడుకు భవిష్యత్‌ గురించి ఎలా ఆలోచించాడు? అనే కంటెంట్‌తో ఇది తెరకెక్కింది.

పూర్తి స్థాయి ఫ్యామిలీ అండ్ ఎమోషనల్ కంటెంట్‌తో రూపొందిన 'డియర్ నాన్న' సినిమాను అంజి సలాడి తెరకెక్కించాడు. ఈ చిత్రం ఈ మధ్య కాలంలో వచ్చిన చిత్రాలకు భిన్నంగా రావడంతో ఆరంభంలోనే అందరి దృష్టిని ఆకర్షించింది. అందుకు అనుగుణంగానే మంచి అంచనాలను ఏర్పరచుకుంది. కానీ, ఈ సినిమా విడుదల గురించి మాత్రం ఎలాంటి క్లారిటీ రాలేదు.

చైతన్య రావు - అంజి కలిసి చేసిన 'డియర్ నాన్న' మూవీ షూటింగ్ కంప్లీట్ అయిపోయినా రిలీజ్ డేట్ మాత్రం రివీల్ కాలేదు. ఇలాంటి పరిస్థితుల్లో ఈ చిత్రాన్ని నేరుగా ఓటీటీలో విడుదల చేయబోతున్నట్లు తెలిసింది. అంతేకాదు, ఈ హక్కులను ఫేమస్ ఓటీటీ సంస్థ ఆహా దక్కించుకుంది. ఇక, ఈ ఫుల్ లెంగ్త్ ఫ్యామిలీ మూవీ స్ట్రీమింగ్‌పై ఆహా అధికారిక ప్రకటనను వదిలింది.

గుండెలను పిండేసే ఫ్యామిలీ కథతో రూపొందిన 'డియర్ నాన్న' మూవీని జూన్ 14వ తేదీ నుంచే ఆహా సంస్థ అందుబాటులోకి తీసుకు రాబోతుంది. ఈ విషయాన్ని తాజాగా సోషల్ మీడియా ద్వారా వెల్లడించింది. అంతేకాదు, ఫాదర్స్ డే సందర్భంగా మంచి ఎమోషనల్ మూవీని అందిస్తున్నట్లు తెలిపింది. దీంతో నేరుగా ఓటీటీలో వస్తున్న ఈ చిత్రం కోసం అంతా వేచి చూస్తున్నారు.

ఇదిలా ఉండగా.. '30 వెడ్స్‌ 21' వెబ్ సిరీస్ ఫేమ్ చైతన్య రావు హీరోగా నటించిన 'డియర్ నాన్న' సినిమాలో సీనియర్ తెలుగు నటుడు సూర్య కీలక పాత్రలో నటించారు. ఈ చిత్రాన్ని బ్లాక్ పెప్పర్ ఎంటర్‌టైన్‌మెంట్ బ్యానర్‌పై రాకేష్ మహంకాళీ నిర్మించారు.