Panchayat on OTT: పంచాయత్ వెబ్ సిరీస్‌లోని గ్రామం.. వాస్తవంగా ఎక్కడుందో తెలుసా ?

ఓటీటీలో అత్యంత పాపులర్ అయిన వెబ్ సిరీస్ 'పంచాయత్' మూడవ సీజన్ ఇటీవల ప్రేక్షకుల ముందుకు వచ్చింది. ఈ వెబ్ సిరీస్‌లోని మొదటి రెండు సీజన్‌లు ప్రేక్షకుల నుండి మంచి రెస్పాన్స్ ను దక్కించుకున్నాయి. అందులోని ప్రతి పాత్ర ప్రేక్షకుల హృదయాలను గెలుచుకుంది. ముఖ్యంగా 'పంచాయత్'లోని ఫూలేరా గ్రామంలో జరిగిన ఈ కథ చాలా మందికి దగ్గరైంది. ఈ సిరీస్ వల్ల ఫూలేరా గ్రామం చాలా మంది దృష్టిలో పడింది. మరి అసలు ఈ గ్రామం నిజంగా ఎక్కడుందో ఓ లుక్కేద్దాం.

వెబ్ సిరీస్ పంచాయిత్ లో మనం చూసిన గ్రామం నిజంగానే ఉంది. ఆ ఫూలేరా గ్రామం ఉత్తరప్రదేశ్‌లోని బల్లియా జిల్లాలో ఉన్నట్టు సిరీస్ లో చూపించారు. కానీ ఆ ఊరికి, ఈ సిరీస్ కి ఏమాత్రం సంబంధం లేదు. ఎందుకంటే ఈ సిరీస్ షూటింగ్ జరిగిన గ్రామం నిజానికి మధ్యప్రదేశ్‌లో ఉంది. నిజ జీవితంలో ఈ గ్రామం మధ్యప్రదేశ్‌లోని సెహోర్ జిల్లాలో ఉంది. దీని పేరు నవా మహోడియా. మహోడియా అనే గ్రామంలో 'పంచాయత్' షూటింగ్ పూర్తయింది. ఈ మూడో సీజన్ షూటింగ్ కూడా రెండు నెలల పాటు మహోడియా గ్రామంలోనే జరిగింది.

'పంచాయత్ 3' షూటింగ్ మహోడియా గ్రామ పంచాయతీ మాజీ సర్పంచ్ లాల్ సింగ్ సిసోసియా ఇంట్లో జరిగింది. ఈ సిరీస్‌లో చూపించిన ప్రధాన్‌ జీ ఇల్లు నిజ జీవితంలో లాల్ సింగ్ ఇల్లు. 'పంచాయత్ మొదటి సీజన్‌లో వాటర్ ట్యాంక్ ప్రేక్షకులను విశేషంగా ఆకర్షించింది. ఎందుకంటే ఈ ట్యాంక్‌పైనే సచి జీ, రింకీ మొదటిసారి కలుసుకున్నారు. ఆ వాటర్ ట్యాంక్ కూడా ఈ గ్రామంలోనే ఉంది.

''పంచాయత్' మొదటి, రెండవ సీజన్ షూటింగ్ కూడా మహోడియా గ్రామంలోనే జరగడం విశేషం. ఈ వెబ్ సిరీస్ మహోడియా గ్రామాన్ని సందర్శించే వారి సంఖ్యను పెంచింది. అయితే ఈ క్ర‌మంలో ఆ ఊరి అస‌లు పేరు మార్చార‌ని కొంత మంది గ్రామ‌స్తులు మండి ప‌డుతున్నారు. కాగా 'పంచాయత్ 3' షూటింగ్ వేసవిలో పూర్తయింది. నటీనటులు 45 నుండి 47 డిగ్రీల సెల్సియస్ ఉష్ణోగ్రతలో షూటింగ్ పూర్తి చేశారు.

ఈ సిరీస్ లో పల్లెటూరి జీవితాన్ని మనసుకు హత్తుకునే విధంగా చిత్రీకరించారు. పంచాయత్ 3 సిరీస్ కు దీపక్ కుమార్ మిశ్రా దర్శకత్వం వహించారు జితేంద్ర కుమార్, రఘుబీర్ యాదవ్, నీనా గుప్తా, సాన్విక, చందన్ రాయ్, ఫైసల్ మాలిక్, దుర్గేష్ కుమార్, సునీతా రాజ్వార్, పంకజ్ ఝా ప్రధాన పాత్రల్లో నటించారు.