OTTలోకి బ్లాక్​ బస్టర్​ గ్రహంతరవాసి సినిమా - యాక్షన్​, కామెడీ సూపర్​!

ఓటీటీలోకి సినీ ప్రేక్షకులను అలరించేందుకు మరో కొత్త సినిమా రెడీ అయిపోయింది. అది ఇప్పటికే థియేటర్లలో విడుదలై మంచి హిట్ టాక్​ను తెచ్చుకుంది. సంక్రాంతి పండగ బరిలో దిగి మంచి వసూళ్లను సాధించింది. సైన్స్​ ఫిక్షన్​ గ్రహాంతర వాసి బ్యాక్​డ్రాప్​తో కామెడీ జోడించి ఆడియెన్స్​ను బాగా నవ్వులు పూయించింది. ఇప్పుడా చిత్రమే పలు అడ్డంకులను దాటి ఎట్టకేలకు ఓటీటీలోకి తెలుగు వెర్షన్​లో రాబోతుంది. మరి ఇంతకీ ఆ చిత్రం ఏంటి? ఎందులో స్ట్రీమింగ్ కానుంది? ఎప్పటి నుంచి అందుబాటులో ఉండనుంది పూర్తి వివరాలను స్టోరీలోకి వెళ్లి తెలుసుకుందాం..

పైన్ చెప్పుకున్న సినిమా ఏంటంటే అయలాన్. ఈ ఏడాది కోలీవుడ్ ఇండస్ట్రీలో సంక్రాంతి పండగకు థియేట‌ర్ల‌లో విడుదలై బ్లాక్‌బ‌స్ట‌ర్ టాక్​ను దక్కించుకుంది. అయితే ఈ ముగ్గుల పండక్కి మన దగ్గర భారీ సినిమాల పోటీ ఉండడంతో అయలాన్ వెనక్కి తగ్గి కేవలం కోలీవుడ్​లోనే రిలీజైంది. ఇందులో నటుడు శివ‌ కార్తికేయ‌న్ హీరోగా న‌టించి ఆకట్టుకున్నారు. అసలే ఈయన చిత్రాలకు మంచి క్రేజ్ ఉంటుంది. అందుకే ఈ చిత్రం ధనుశ్ కెప్టెన్​ మిల్లర్​కు పోటీగా అక్కడ విడుదలై మంచి హిట్ టాక్​ను తెచ్చుకుంది. అలా ఈ సైన్స్ ఫిక్ష‌న్ మూవీకి దాదాపు రూ. 96 కోట్ల‌కుపైగా క‌లెక్ష‌న్స్ వచ్చాయి. 2024లో కోలీవుడ్‌లో అత్య‌ధిక వ‌సూళ్లను ద‌క్కించుకున్న సినిమాల్లో ఒక‌టిగా నిలిచింది.

అయితే ఈ సినిమాకు తెలుగులో మంచి బజ్ క్రియేట్ అయింది. ఈ చిత్రాన్ని చూడాలని చాలా మంది ఆశించారు. దీంతో సంక్రాంతి పండగ అయిపోయిన రెండు వారాలకు విడుదల చేయాలని మేకర్స్ డెసిషన్ తీసుకున్నారు. ప్రమోషన్స్​ కూడా చేశారు. ఇందులో శివ కార్తికేయన్ కూడా పాల్గొని సందడి చేశారు. కానీ కొన్ని అనివార్య కారణాల వల్ల అది కుదరలేదు.

వీఎఫ్ఎక్స్ వల్ల తెలుగు వెర్ష‌న్ రిలీజ్ పోస్ట్ పోన్​ అయిందని ఆ మధ్య ప్రచారం కూడా సాగింది. దీంతో ఈ సినిమాను ఓటీటీలోనైనా చూడాలని చాలా మంది ఆశపడ్డారు. అయినా డబ్బింగ్ పనులు పూర్తైనప్పటికీ కూడా ఓటీటీ రిలీజ్​కు నోచుకోలేదు. కేవలం తమిళ వెర్షన్​లోనే ఇది అందుబాటులోకి వచ్చింది. అయితే ఎట్టకేలకు ఇంత కాలానికి ఇప్పుడు ఓటీటీలో తెలుగు వెర్షన్​ రిలీజ్​కు సిద్ధమైందీ చిత్రం. దీని ఓటీటీ రైట్స్​ స‌న్ నెక్స్ట్ ద‌క్కించుకుంది. ఇప్పుడీ చిత్రాన్ని ఏప్రిల్​ 19న ఓటీటీలో స్ట్రీమింగ్​కు సిద్ధం చేయనున్నట్లు స‌మాచారం అందింది.

ఈ చిత్రంలో నాజూకు భామ ర‌కుల్ ప్రీత్‌సింగ్ హీరోయిన్‌గా న‌టించింది. ఎలియ‌న్ పాత్ర‌కు హీరో సిద్ధార్థ్ వాయిస్ ఓవ‌ర్ ఇచ్చారు. హీరో శివ‌కార్తికేయ‌న్‌తో పాటు సిద్ధార్థ్ ఈ చిత్రానికి రెమ్యున‌రేష‌న్ తీసుకోలేదని అప్పట్లో అన్నారు. ఇందులో నిజమెంతో తెలీదు. ఏఆర్ రెహ‌మాన్ సంగీతం సమకూర్చారు. ఈ మూవీ షూటింగ్ దాదాపు ఎనిమిదేళ్ల పాటు సాగిందట. 2016లో చిత్రాన్ని ప్రకటించగా అన్నీ అడ్డంకుల‌ను దాటి 2024లో రిలీజైంది.

ఇకపోతే హీరో శివ కార్తికేయన్​ ప్రస్తుతం అమ‌ర‌న్ పేరుతో ఓ బ‌యోపిక్ చిత్రాన్ని చేస్తున్నారు. ఇండియ‌న్ ఆర్మీ అధికారి మేజ‌ర్ ముకుంద్ వ‌ర‌ద‌రాజ‌న్ జీవితం ఆధారంగా ఇది తెరకెక్కుతోంది. సాయిప‌ల్ల‌వి హీరోయిన్‌గా న‌టిస్తోంది. యూనివర్సల్ స్టార్​ క‌మ‌ల్‌ హాస‌న్ నిర్మిస్తున్నారు. రాజ్‌కుమార్ పెరియాసామి ద‌ర్శ‌క‌త్వం వ‌హిస్తున్నారు. మరో సీనియర్ దర్శకుడు మురుగ‌దాస్‌తోనూ శివ‌కార్తికేయ‌న్ ఓ సినిమా చేయనున్నారు.